Заказнік-журавіннік (з 2007 г. біялагічны заказнік рэспубліканскага значэння) "Дубатоўскае" быў створаны ў Смаргонскім раёне Гродзенскай вобласці ў 1979 г. Мэтай заснавання стала зберажэнне ў прыродным стане месцаў росту журавін на балоце вярховага тыпу Дубатоўка.

Плошча ахоўнай тэрыторыі складае 839 га. Тут маюцца два невялікія возеры, а таксама мінеральныя “астравы”, пакрытыя хваёва-бярозавым рэдкалессем з дамешкам асіны, чорнай алешыны і дуба. Па краі балота пераважае асакова-пушыцава-сфагнавая расліннасць. У флоры зарэгістраваны 434 віды сасудзістых раслін, з якіх журавіны дробнаплодныя і купальнік горны занесены ў Чырвоную кнігу Рэспублікі Беларусь. Жывёльны свет прадстаўлены 78 відамі пазваночных жывёл. Водзяцца лось, дзік, казуля, ліса, воўк, глушэц, сярод ахоўных відаў – барсук і шэры журавель.

У вызначаныя тэрміны на тэрыторыі заказніка дазволены паляванне, збор ягад і грыбоў.

Матэрыял падрыхтаваны ў 2023 г.