Шклоўскі раённы гісторыка-краязнаўчы музей, УК

Дата начала: 27.06.1990 Шклоў, г., Магілёўская вобласць

Краткая справка: установа культуры

Названия на других языках: Shklou District Historico-Homeland Museum (английский); Шкловский районный историко-краеведческий музей (русский);

Шклоўскі раённы гісторыка-краязнаўчы музей заснаваны 27. 06. 1990 г. у Шклове паводле рашэння Шклоўскага раённага Савета народных дэпутатаў. Ён быў адкрыты для наведвальнікаў 1 верасня 2007 г. непасрэдна перад правядзеннем у горадзе Дня беларускага пісьменства.

Асноўны фонд музея налічвае звыш 4 тыс. адзінак захоўвання, навукова-дапаможны – звыш 2 тыс. адзінак. У музеі маецца экспазіцыйная зала пл. 239 кв. м і выставачная зала пл. 142 кв. м.

Экспазіцыя “Шклоўшчына са старажытных часоў да сучаснасці” складаецца з сямі раздзелаў. У раздзеле “Шклоўскія старажытнасці” прадстаўлены прадметы археалагічных даследаванняў, праведзеных на тэрыторыі раёна. Тут экспануюцца: зуб маманта (узрост 150 тыс. гадоў), бронзавае кальцо эпохі Кіеўскай Русі, калекцыя прадметаў побыту і жаночых упрыгожванняў, знойдзеных у раскопках гарадзішча ў в. Крывель (3 тыс. гадоў), калекцыя манет XVІ – XVIII ст. з замчышчаў у в. Рыжковічы і інш. Раздзел “Шклоўшчына ў складзе Вялікага Княства Літоўскага і Рэчы Паспалітай у XIV – XVIII ст.” адлюстроўвае гісторыю старажытнага Шклова ў пісьмовых крыніцах. Гэта расказ аб гісторыі Шклоўскага замка, старажытнай ратушы, уладальніках Шклова XVІ–XVIII ст., аб наданні гораду магдэбургскага права, сацыяльна-эканамічным развіцці, рэлігійных канфесіях. У раздзеле “Шклоўскія землі ў складзе Расійскай імперыі XVIII–ХІХ ст.” расказваецца аб уладальніках Шклоўскага маёнтка ў 1773–1790 гг., Шклоўскім графстве, С. Г. Зорычу, які стварыў у Шклове тэатр, шляхецкае вучылішча, мануфактуру, вайне 1812 г. на Шклоўшчыне. У экспазіцыі прадстаўлены раздзелы: “Шклоўскі край у перыяд трох рэвалюцый і 1-й сусветнай вайны 1914 – 1917 гг.”, “Будаўніцтва новага грамадскага ладу 1918–1941 гг.”, “Шклоўскі раён у гады Вялікай Айчыннай вайны 1941–1945 гг.”, “Пасляваеннае адраджэнне Шклоўскага раёна. Шклоўскі край на сучасным этапе”.

Пры музеі працуе салон-магазін “Фарбы зямлі”, у якім рэалізуюцца вырабы народных умельцаў.

Музей мае тры філіялы: музей “Райсельгастэхніка”, Музей працоўнай і баявой славы, Дом-музей П. Алейнікава.

Матэрыял падрыхтаваны ў 2015 г.