Заснаваны паводле рашэння выканкама Чэрвеньскага раённага Савета народных дэпутатаў ад 27 лістапада 1991 г. у г. Чэрвень як краязнаўчы музей. Адкрыты для наведвальнікаў 1 верасня 1992 г. Ім кіравалі А. С. Фурык, А. М. Аўласенка. З 2001 г. дырэктарам з'яўляецца А. В. Забаронак. У 2004 г. быў перайменаваны ў дзяржаўную ўстанову «Чэрвеньскі раённы краязнаўчы музей».

Ён размяшчаецца ў былым будынку павятовай управы. Асноўны фонд налічвае каля 8 тыс. адзінак захоўвання, навукова-дапаможны – больш за 1, 2 тыс. (даныя на 2015 г.). Плошча экспазіцыі складае 329 кв. м. У музеі 3 экспазіцыйныя залы: «Ігуменшчына старажытная», «Вялікая Айчынная вайна на Чэрвеньшчыне», «Культурныя дасягненні Чэрвеньшчыны». У зале «Ігуменшчына старажытная» прадстаўлены матэрыялы, прысвечаныя гісторыі гэтых зямель, узнікненню Ігумена (у 1923 г. перайменаваны ў Чэрвень), народным традыцыям, развіццю гаспадаркі, рамёстваў і промыслаў, медыцыны і адукацыі. Сярод экспанатаў археалагічныя знаходкі ХIII ст. (жаночыя ўпрыгажэнні, фрагменты глінянага посуду і інш.), прадметы сялянскага побыту, прылады пчалярства канца ХIХ – пачатку ХХ ст. і інш. Захоўваюцца фотаздымкі, дакументы, асабістыя рэчы ўдзельнікаў Кастрычніцкай рэвалюцыі 1917 г., Першай сусветнай і грамадзянскай войнаў. У зале «Вялікая Айчынная вайна на Чэрвеньшчыне» вылучаны наступныя раздзелы: пачатак вайны і акупацыя Чэрвеньскага раёна, арганізацыя падпольнага руху, партызанская барацьба, вызваленне раёна ад нямецка-фашысцкіх захопнікаў, землякі на франтах вайны, героі і подзвігі, ахвяры вайны. Расказваецца пра дзейнасць на тэрыторыі раёна партызанскіх брыгад, арганізатараў падпольнага руху і асноўных напрамках работы падпольных органаў, ваенных фарміраванняў і падраздзяленняў, якія прымалі ўдзел у вызваленні раёна. Зберагаюцца дакументы, фатаграфіі, асабістыя рэчы, успаміны землякоў – Герояў Савецкага Саюза, былых партызан і падпольшчыкаў. У экспазіцыі залы «Культурныя дасягненні Чэрвеньшчыны» змешчаны матэрыялы, прысвечаныя знакамітым землякам: кампазітару С. Манюшку, мастаку Х. Суціну, пісьменніку М. Пянкрату, алімпійскаму чэмпіёну В. Шарыю, народнаму майстру М. Няхаю, ганаровым грамадзянам горада, заслужаным работнікам розных галін эканомікі і культуры. Наведвальнікі знаёмяцца з сучаснай гісторыяй горада і раёна, народнымі традыцыямі, творчасцю майстроў дэкаратыўна-прыкладнога мастацтва, удзельнікаў мастацкай самадзейнасці. Рашэннем Чэрвеньскага райвыканкама ад 20.12.2007 г. музею перададзена экспазіцыя «Кампазітар Станіслаў Манюшка», якая знаходзіцца ў музеі ў п. Азёрны Чэрвеньскага раёна.

У музеі праводзяцца тэматычныя экскурсіі, выстаўкі як з уласных, так і з фондаў іншых арганізацый (музеяў, навучальных і клубных устаноў), на аснове калекцый прыватных асоб. Арганізоўваюцца экскурсіі па гораду, лекцыі ў вучэбных і працоўных калектывах горада і раёна, музейна-педагагічныя заняткі са школьнікамі. Распрацавана праграма «Мой край завецца Беларуссю». Пры музеі працуе інтэлектуальна-асветніцкі клуб «Бонда».

Матэрыял падрыхтаваны ў 2017 г.