Міжнародны фестываль “Славянскія тэатральныя сустрэчы” быў арганізаваны як агляд творчасці беларускіх, рускіх і ўкраінскіх тэатраў прыгранічных рэгіёнаў Чарнігаўшчыны, Браншчыны і Гомельшчыны. Праводзіцца раз у тры гады ў Гомелі. Аналагічныя фестывалі адбываюцца ў Бранску і Чарнігаве.

Першыя “Славянскія тэатральныя сустрэчы” адбыліся ў 1989 г. У ім прынялі ўдзел усяго некалькі калектываў з Гомеля, Бранска і Чарнігава. За гады існавання геаграфія ўдзельнікаў мерапрыемства значна пашырылася: да яго далучыліся тэатры з Германіі і Малдовы (2011). Фестываль спрыяе аднаўленню агульнай тэатральнай прасторы, а таксама садзейнічае ўмацаванню і развіццю творчых сувязей паміж тэатральнымі калектывамі блізкага і далёкага замежжа, узнікненню новых кантактаў, узаемаўзбагачэнню брацкіх славянскіх культур.

З кожным годам “Славянскія тэатральныя сустрэчы” мяняюцца ў лепшы бок, набіраюць моцы, становяцца буйным творчым форумам. Удзельнікі фестывалю прытрымліваюцца ідэі прадстаўлення на сцэне пастановак паводле лепшых узораў славянскай драматургіі. Фестывальная афіша заўсёды ўтрымлівае імёны знакамітых рускіх, украінскіх і беларускіх класікаў: А. Талстога, І. Мележа, Я. Купалы, Г. Квіткі-Аснаўяненкі, Л. Андрэева, Ф. Салагуба і інш. У час фестываляў праводзяцца канферэнцыі, абмеркаванні спектакляў, творчыя сустрэчы.

Матэрыял падрыхтаваны ў 2012 г.