Біялагічны заказнік рэспубліканскага значэння “Буслоўка” быў створаны на тэрыторыі Бярозаўскага і Пружанскага раёнаў Брэсцкай вобласці ў 1997 г. Мэтай заснавання стала забеспячэнне экалагічнай раўнавагі ў басейне рэк Ясельда, Хатава і Радагошч, парушанай буйнамаштабнай меліярацыяй ХХ ст. У 1998 г. частка тэрыторыі заказніка з вадасховішчам Сялец атрымала міжнародны статус ключавой арніталагічнай тэрыторыі.

Агульная плошча складае 8099,16 га. Большая частка рэльефу раўнінная. Тут існуе сістэма штучных каналаў, працякаюць рэкі Мацоўка і Чорная. Лясны масіў займае каля 80% тэрыторыі. Праз заказнік праходзяць лясныя калідоры паўночна-заходняга напрамку, якія злучаюць яго з нацыянальным паркам “Белавежская пушча”. Галоўныя лесаўтваральныя пароды – хвоя, чорная вольха, елка, асіна. Флора і фаўна заказніка вылучаюцца вялікай разнастайнасцю і наяўнасцю значнай колькасці рэдкіх і знікаючых відаў раслін і жывёл. У складзе флоры больш за 500 відаў сасудзістых раслін, з якіх у Чырвоную кнігу Рэспублікі Беларусь занесены баранец звычайны, сон лугавы, кураслеп лясны, гарлачык белы, зубніца клубняносная, лiлея кучаравістая, тайнiк яйцападобны, касач сібірскі, шпажнiк чарапiцавы і інш. Сярод прадстаўнікоў жывёльнага свету пад аховай знаходзяцца барсук, рысь, арэшнікавая соня, шэры журавель, арлан-белахвост, пугач. На мясцовых вадаёмах, дзякуючы наяўнасці вялікіх плошчаў надводнай расліннасці, мноству рыбы і штучных кармоў, склаліся выключна спрыяльныя ўмовы для гнездавання і пасялення вадаплаўных птушак: чаплі-бугая, нырка-сівака, лыскі, качкі-крыжанкі, вялікага баклана і інш.

Заказнік з'яўляецца аб'ектам экалагічнага турызму. У вызначаныя тэрміны тут дазволена паляванне.

Матэрыял падрыхтаваны ў 2023 г.