Ландшафтны (з 2022 г. рэспубліканскі) заказнік “Старыца быў створаны ў Быхаўскім раёне Магілёўскай вобласці ў 1997 г. Мэтай яго заснавання стала зберажэнне спецыфічных поймавых ландшафтаў у даліне р. Днепр. Тут утварыліся шматлікія старыцавыя азёры серпападобнай формы, найбольш маляўнічае з якіх – возера Старыца, ад якого і атрымаў назву заказнік.

Плошча ахоўнай тэрыторыі складае 2 033 га. Тут сустракаюцца пойменныя дубровы, лугі, зараслі хмызнякоў, нізінныя балоты. У флоры налічваецца каля 300 відаў сасудзістых раслін, з якіх вадзяны арэх плывучы ўнесены ў Чырвоную кнігу Рэспублікі Беларусь. Растуць таксама вольха шэрая, вяз коркавы, уман звычайны, шмат меданосных і лекавых раслін. У межах заказніка жывуць заяц-русак, лісіца, андатра, бабёр, мноства птушак. Маюцца рэдкія віды птушак (карасцель і дупель) і насякомых (вялікая пераліўніца, жужалі рашэцісты і фіялетавы).

Заказнік з’яўляецца папулярным аб’ектам экалагічнага турызму. Тут праводзяцца пешыя і веласіпедныя экскурсіі, абсталявана экалагічная сцежка, падрыхтаваны пляцоўкі для стаянкі аўтамабіляў, развядзення вогнішчаў і турысцкіх стаянак. У вызначаныя тэрміны дазволена паляванне і рыбалка.

Матэрыял падрыхтаваны ў 2023 г.