Біялагічны заказнік рэспубліканскага значэння “Сціклева” быў створаны ў Мінскім раёне ў 2001 г. Мэтай заснавання стала зберажэнне ў прыродным стане ўчасткаў каштоўных лясных фармацый з папуляцыямі рэдкіх відаў раслін і жывёл.

Ахоўная тэрыторыя плошчай 428 га размешчана на Мінскім узвышшы ў межах зялёнай зоны Мінска і ўключае частку буйнога ляснога масіву і частку былога ваеннага палігона. Расліннасць заказніка пераважна лясная з перавагай хвоі. У флоры выяўлена 370 відаў сасудзістых раслін. Шмат лекавых, харчовых, кармавых, меданосных і дэкаратыўных: валяр’ян лекавы, падтыннік, святаяннік прадзіраўлены, папараць мужчынская, шыпшына, крываўнік, касач сібірскі і інш. Сярод ахоўных відаў трапляюцца купальнік горны, пярэсна еўрапейская, лінея паўночная, лілея кучаравістая. У лесе водзяцца казуля, ліса, вожык, сойка, шэрая варона, сарока, каўка, грак, вушастая сава, дзяцел, дрозд і інш. Сустракаецца занесеная ў Чырвоную кнігу Рэспублікі Беларусь пустальга звычайная – драпежная птушка з атрада сокалападобных.

Для турыстаў абсталяваны месцы для адпачынку, па тэрыторыі заказніка пракладзена экалагічная сцежка, праводзяцца пешыя і веласіпедныя экскурсіі.

Матэрыял падрыхтаваны ў 2023 г.