Ландшафтны заказнік рэспубліканскага значэння “Сялява” быў створаны на тэрыторыі Крупскага раёна Мінскай вобласці і Чашніцкага раёна Віцебскай вобласці ў 1993 г. Мэтай заснавання стала зберажэнне ў прыродным стане ўнікальнага ландшафтна-азёрнага комплексу з папуляцыямі рэдкіх відаў жывёл і раслін.

Ахоўныя ўгоддзі плошчай 19,3 тыс. га ўключаюць азёры Сялява, Абіда, Худава, Болюцкае, Квеціна, рэкі Ракітоўка і Югна. Лясы займаюць каля паловы тэрыторыі заказніка. У флоры выяўлена больш за 700 відаў вышэйшых сасудзістых раслін, з якіх у Чырвоную кнігу Рэспублікі Беларусь унесены купальнік горны, баранец звычайны, гайнік цёмна-чырвоны, пярэсна еўрапейская, шпажнік чарапіцавы і інш. Прыродны комплекс насяляюць арэшнікавая соня, барсук, буры мядзведзь, скапа, змеяед, бугай малы і вялікі, малы падворлік, каршачок, дзербнік, звычайная пустальга і інш. У азёрах шмат прамысловых відаў рыб: лешч, шчупак, сом, язь, судак, плотка, гусцяра.

Заказнік з’яўляецца аб’ектам экалагічнага турызму. Для наведвальнікаў абсталяваны месцы для адпачынку і экалагічная сцежка, па тэрыторыі праводзяцца водныя, веласіпедныя і пешыя экскурсіі. У ваколіцах маюцца помнікі гісторыі і архітэктуры, працуюць аграсядзібы. У вызначаны час тут дазваляецца паляванне і аматарскае рыбалоўства.

Матэрыял падрыхтаваны ў 2023 г.