Вілейскае прадпрыемства “Зеніт” уваходзіць у склад холдынга “БелОМА” і з’яўляецца прызнаным лідэрам аптычнага прыборабудавання.

Оптыка-механічны завод быў створаны ў 1973 г. у якасці спецыялізаванага вытворцы фотаапаратаў. У савецкі час прадпрыемства славілася сваімі легендарнымі фотаапаратамі “Зеніт”, “Эцюд” і “Элікон”. Кожны трэці фотаапарат у СССР быў выраблены ў Вілейцы. У 1980-я гг. завод “Зеніт” быў адным з вядучых прадпрыемстваў у СССР па выпуску армейскіх аптычных прыцэлаў.

У 2008 г. завод быў пераўтвораны ў адкрытае акцыянернае таварыства “Зеніт-БелОМА” (ААТ “Зеніт-БелОМА”). Спецыфіка вытворчасці захавалася да гэтага часу, што дало магчымасць давесці выраб аптычнай прадукцыі да вельмі высокага ўзроўню. Сёння прадпрыемства выпускае наступныя віды прадукцыі: прыцэлы аптычныя для спецыяльнай тэхнікі; прыцэлы аптычныя для стралковай зброі і паляўнічых стрэльбаў; мацаванні да прыцэлаў і паляўнічыя прыналежнасці; біноклі; аўтатрактарныя дэталі і вузлы; вагавымяральныя медыцынскія прыборы.

ААТ “Зеніт-БелОМА” з’яўляецца партнёрам і вытворцам прадукцыі для такіх прадпрыемстваў, як МАЗ, КамАЗ, БелАЗ, МТЗ, а таксама адзіным заводам-вытворцам медыцынскага вагавага абсталявання на тэрыторыі Рэспублікі Беларусь. Службы завода пастаянна вядуць работу па павышэнні спажывецкіх уласцівасцей і якасці выпускаемай прадукцыі. Дзякуючы высокай якасці і зручнасці ў выкарыстанні вырабы Вілейскага завода набываюць каля 40 краін краін свету.

ААТ “Зеніт-БелОМА” пастаянна праводзіць работы па мадэрнізацыі і тэхнічным пераўзбраенні вытворчасці. На 2021–2025 гг. прадпрыемствам запланаваны да рэалізацыі праект “Стварэнне ўчастка высокапрадукцыйнага абсталявання для вытворчасці інавацыйных вырабаў прыцэльнай тэхнікі і аўтакампанентаў”, у рамках якога будзе зроблена закупка новага абсталявання, створаны шэраг новых працоўных месцаў.

Матэрыял падрыхтаваны ў 2022 г.