Баранавіцкая швейная фабрыка пачала працаваць у Баранавічах (Брэсцкая вобласць) у 1944 г. Спачатку гэта была швейная майстэрня ў складзе 25 чалавек, куды запрашаліся работнікі са сваімі швейнымі машынкамі, сталамі, крэсламі, прасамі і інш. Часта сыравінай для пашыву адзення служыла старое абмундзіраванне і парашуты. Паступова фабрыка пашыралася: у 1950 г. тут працавалі ўжо больш за 200 чалавек, з’явілася новае абсталяванне, у 1957 г. быў узведзены асобны будынак. У 1974 г. фабрыцы прысвоена імя С. І. Грыцаўца – ваеннага лётчыка, мясцовага ўраджэнца. У 1975–1985 гг. Баранавіцкая і Навагрудская швейныя фабрыкі ўтваралі Баранавіцкае вытворчае швейнае аб’яднанне. Яго спецыялізацыяй у гэты час з’яўляўся выпуск школьнага адзення для хлопчыкаў і вырабаў для ваенных ведамстваў. У 1992 г. прадпрыемства ўвайшло ў склад канцэрна “Беллегпрам”, у 1999 г. – перайменавана ў Баранавіцкую швейную фабрыку “Бараўчанка”. З 2009 г. – сучасная назва.

У цяперашні час дзейнічаюць швейны, раскройны, падрыхтоўчы і эксперыментальны цэхі. Прадпрыемства выпускае прадукцыю гандлёвай маркі “ТВОЕ”. У асартыменце – мужчынскае, жаночае і дзіцячае адзенне з трыкатажнага палатна, швейныя вырабы. Фабрыка прымае ўдзел у рэспубліканскіх і міжнародных выстаўках-ярмарках, яе прадукцыя неаднаразова была адзначана дыпломамі за якасць.

Матэрыял падрыхтаваны ў 2025 г.