Гісторыя ансамбля танца «Лялечкі» Абухаўскага цэнтра культуры і вольнага часу пачалася з невялікага танцавальнага гуртка. Нязменным кіраўніком з'яўляецца Н. Урукіна, якая ў 1998 г. за высокія творчыя дасягненні атрымала ганаровае званне «Заслужаны дзеяч культуры Рэспублікі Беларусь». З самага пачатку дзейнасці яна ўмела заахвочвала дзяўчынак і хлопчыкаў ва ўзросце ад 5 да 16 гадоў да заняткаў. Дзякуючы стараннай і натхнённай працы калектыву ў 1982 г. дзіцячаму ансамблю было прысвоена званне «ўзорны», у 2006 г. – «заслужаны аматарскі калектыў». Балетмайстрам працуе былая ўдзельніца «Лялечак» Т. Урукіна. Каб рэпертуар быў цікавым і разнастайным, калектыў увесь час знаходзіцца ў няспынным творчым пошуку. Былі прадстаўлены вялікія харэаграфічныя кампазіцыі («Маленькая краіна», «Вясковыя замалёўкі», «Фарбы Беларусі», «На лясным ускрайку»), замалёўкі («Воўк і сямёра казлянат», «Рускі сувенір»), сюіты «Гуканне вясны» ў музычнай апрацоўцы Д. Лойкі і «Час, уперад», танцавальная карцінка «Кошкі-мышкі», беларускія («Чабаток», «Весялуха», «Вянок беларускіх танцаў», «Кадрыля», «Мяцёлачкі», «Веснавыя забавы») і рускія («Матрошкі», «Калінка», «Казачок») танцы, танцы-гульні «Лялечкі», «Кураняткі», бальны танец «Фігурны вальс» і інш. Сапраўднай творчай удачай стаў міні-балет «Дзюймовачка» па аднайменнай казцы Г. Х. Андэрсена на музыку Д. Мазітавай. Гэта казачнае прадстаўленне вылучаецца вакальным майстэрствам і артыстызмам выканаўцаў, цікавым сюжэтам, прыгожымі сцэнічнымі касцюмамі. Калектыў з'яўляецца дыпламантам і лаўрэатам розных фестываляў: міжнароднага 33-га дзіцячага «Радасць Еўропы» (Бялград, 2008), 5-га маладзёжнага «Дэльфійскія гульні» (Мінск, 2008), Рэспубліканскіх нацыянальных культур (2008) і абласнога адкрытага фестывалю танца «Гарадзенскія карункі» (2009, абодва г. Гродна). У 2001 г. ансамбль атрымаў грант фонду Прэзідэнта Рэспублікі Беларусь па падтрымцы таленавітай моладзі. Актыўна выступае на рэспубліканскіх, абласных, раённых, а таксама замежных канцэртах, конкурсах і іншых мерапрыемствах. Прымаў удзел у запісах праграм на Гродзенскім абласным тэлебачанні.

Ужо 40 гадоў вядзе свой творчы летапіс ансамбль. Змянілася не адно пакаленне ўдзельнікаў, абнавіўся рэпертуар. Некаторыя з выхаванцаў сталі прафесіяналамі ў харэаграфіі, працуюць выкладчыкамі ў школах вобласці.

Матэрыял падрыхтаваны ў 2018 г.