Валерый Аляксеевіч Жмайлік нарадзіўся 23 студзеня 1951 г. у в. Севашкі Ваўкавыскага р-на Гродзенскай вобласці. У 1972 г. скончыў Беларускі інстытут інжынераў чыгуначнага транспарту (Гомель). У 1972—1974 гг. працаваў начальнікам канструктарскага бюро Карынскага транспартнага ўпраўлення ў г. Кірава-Чапецк (Расійская Федэрацыя).

Працоўны стаж Валерыя Аляксеевіча на вытворчым аб’яднанні “Гомсельмаш” пачаўся ў 1974 г. Спачатку працаваў майстрам, потым – механікам цэха, намеснікам начальніка цэха, начальнікам цэха, дырэктарам вытворчасці самаходных камбайнаў завода “Гомсельмаш”. З 1988 г. В.А. Жмайлік прызначаны дырэктарам завода самаходных камбайнаў, а з 1995 г. – генеральным дырэктарам ВА “Гомсельмаш”.

Валерый Аляксеевіч — кандыдат тэхнічных навук, член-карэспандэнт Беларускай інжынернай акадэміі, заслужаны работнік прамысловасці Рэспублікі Беларусь. В.А. Жмайлік узнагароджаны ордэнам Айчыны III ступені, медалём “За працоўную доблесць”, Ганаровай граматай Савета Мiнiстраў Рэспублiкi Беларусь. Акрамя таго яму абвешчана Падзяка Прэзідэнта Рэспублікі Беларусь і прысвоена званне “Ганаровы грамадзянін Гомельскай вобласці”.

Валерый Аляксеевіч Жмайлік унёс вялікі ўклад ва ўкараненне перадавых тэхналогій, накіраваных на паляпшэнне якасці прадукцыі прадпрыемства, мадэрнізацыю і нарошчванне вытворчых магутнасцей па выпуску камбайнаў, зніжэнне выдаткаў на прадукцыю, якую выпускае прадпрыемства, паляпшэнне ўмоў працы.

В.А. Жмайлік — аўтар шматлікіх вынаходстваў у вобласці вытворчасці кормаўборачнай тэхнікі.