Беларуская вакальная група «Чысты голас» створана ў Мінску ў 1992 г. пры ЗАТ «Белтэхэкспарт». З 2005 г. яна існуе пры дзяржаўнай установе «Мінскканцэрт». Калектыў з'яўляецца лаўрэатам фестываляў духоўнай музыкі і прэміі «За духоўнае адраджэнне» (1996). Рэпертуар групы вызначаецца творамі розных жанраў. Сярод асноўных музычных напрамкаў, прадстаўленых у творчасці артыстаў – праваслаўныя духоўныя песнапенні, класічныя творы, беларускія, рускія, украінскія народныя песні, рамансы, хіты 1960–1980-х гг., папулярныя творы сучаснай эстрады. Мастацкім кіраўніком калектыву з'яўляецца Валерый Прыгун.

У 1994 г. група атрымала Гран-пры Міжнароднага фестывалю духоўнай музыкі «Магутны Божа» ў Магілёве. У гэтым жа годзе прайшлі дабрачынныя выступленні артыстаў у Германіі, адбыўся першы сольны канцэрт у Маскве, у Калоннай зале Дома саюзаў. Група выступіла ў Астанкіна. Быў зроблены дакументальны фільм пра калектыў, а на радыёстанцыі «Маяк» выйшаў цыкл праграм пра іх творчасць. У 1995 г. адбыўся выпуск першага альбома пад назвай «Пой, славянская душа», а неўзабаве другога – «Рождение на небесах», запісанага ў Германіі. «Чысты голас» у 1997 г. выступаў у пасольствах Беларусі і Расійскай Федэрацыі ў Вашынгтоне і штаб-кватэры ААН у Нью-Ёрку. У 2000 г. вакальная група падрыхтавала сумесна з народным артыстам Беларусі У. Гасцюхіным праграму «На вайне як на вайне», прысвечаную 55-годдзю Вялікай Перамогі. У ёй прагучалі песні ваенных гадоў, папулярныя творы аб Вялікай Айчыннай вайне. На фестывалі праваслаўнага харавога мастацтва ў г. Гайнаўка (Польшча) у 2002 г. калектыў заваяваў другую прэмію і спецыяльны прыз. У 2003 г. у рамках Дзён культуры ў Францыі адбыўся канцэрт вакальнай групы ў музеі М. Шагала ў Ніццы. У 2004 г. артысты прымалі ўдзел у Днях культуры Беларусі ў Расіі.

Калектыў удзельнічаў у пастаноўцы спектакля «Анна Снегина» па аднайменнай паэме С. Ясеніна ў рэжысуры У. Гасцюхіна (2006). Гэты твор быў паказаны ў Маскве ў рамках тэатральнага фестывалю «Золотой Витязь», дзе стаў адным з лаўрэатаў. 10 сакавіка 2011 г. кампазіцыя прагучала ў час святкавання 65-годдзя знакамітага акцёра і рэжысёра ў Мінску.

Для ўмацавання іміджу Беларусі на міжнароднай арэне, фарміравання прадстаўлення аб беларускай культуры за мяжой вялікае значэнне маюць Дні культуры Беларусі ў розных краінах свету, удзел беларускіх калектываў у міжнародных фестывалях, гастролі. Вакальная група «Чысты голас» з'яўляецца ўдзельнікам такіх маштабных мерапрыемстваў, як Сусветная выстаўка «EХPО-98» (Лісабон), «ЕХРО-2000» (Гановер), Дні Рэспублікі Беларусь у Расіі, Малдове, Украіне, Азербайджане, Казахстане, краінах Балтыі, Польшчы, Кітаі, Венесуэле, Туркменістане і інш. У лютым 2007 г. у Лондане артысты прымалі ўдзел у святочных мерапрыемствах, прысвечаных уручэнню каралеве Лізавеце II вярыцельнай граматы Надзвычайнага і Паўнамоцнага Пасла Рэспублікі Беларусь у Вялікабрытаніі. «Чысты голас» з поспехам прадстаўляў сваё мастацтва ў Аўстрыі, Італіі, Чэхіі, Турцыі, на Мальце і ў іншых краінах. Выступленні калектыву ўражваюць гледачоў індывідуальнай манерай выканання, якая вызначаецца чысцінёй гучання, жанравай разнастайнасцю і высокім густам.

Матэрыял падрыхтаваны ў 2012 г.