Віктар Іванавіч Базылеўскі нарадзіўся ў Брэсце. У школьныя гады пачаў займацца спартыўнай гімнастыкай і акрабатыкай. У 1964 г. пасля атрымання атэстата аб сярэдняй адукацыі пачаў працаваць столярам на Брэсцкай мэблевай фабрыцы.

Майстар спорту СССР па акрабатыцы Віктар Базылеўскі ўваходзіў у склад зборнай каманды БССР, быў адным з наймацнейшых акрабатаў рэспублікі, неаднаразовым чэмпіёнам і прызёрам БССР, меў высокія спартыўныя вынікі – 6 месца на V Усесаюзных летніх студэнцкіх гульнях у 1966 г. У 1969 г. скончыў Беларускі дзяржаўны ордэна Працоўнага Чырвонага Сцяга інстытут фізічнай культуры (цяпер – Беларускі дзяржаўны ўніверсітэт фізічнай культуры) і быў накіраваны на працу ў Брэсцкую дзіцяча-юнацкую спартыўную школу № 1 (ДЮСШ) на пасаду трэнера-выкладчыка па акрабатыцы.

У 1970 г. В. Базылеўскі пераехаў у Гомель і пачаў працаваць трэнерам-выкладчыкам па акрабатыцы ў ДЮСШ № 4. З 1972 па 1981 г. прымаў удзел у падрыхтоўцы жаночай зборнай СССР па гімнастыцы.

В.І. Базылеўскім падрыхтаваны шэсць майстроў спорту СССР па акрабатыцы і некалькі чэмпіёнаў: Мікалай Котаў – чэмпіён усесаюзнай спартакіяды школьнікаў па спартыўнай гімнастыцы, Віктар Левянкоў – чэмпіён моладзевых гульняў, чэмпіён СССР, Алена Палявая – чэмпіёнка свету і пераможца ўсесаюзных моладзевых гульняў па спартыўнай гімнастыцы.

З 1982 па 1985 гг. В.І. Базылеўскі працаваў у Германіі, за што атрымаў ганаровыя граматы камандавання Групы савецкіх войск у Германіі і медаль Міністэрства адукацыі ГДР. У 1985 г. вярнуўся на Гомельшчыну і працягнуў працоўную дзейнасць у СШ № 39 настаўнікам па фізічным выхаванні, у 1986 г. пераведзены ў школу-новабудоўлю № 52 Гомеля. Пасля аварыі на Чарнобыльскай АЭС В.І. Базылеўскі прымаў актыўны ўдзел у кампаніі па аздараўленні школьнікаў за межамі краіны. У 1992 г. Віктар Іванавіч звольніўся з працы і перайшоў у Цярухскі дзіцячы дом, дзе працаваў інструктарам па фізічным выхаванні, намеснікам дырэктара па адміністрацыйна-гаспадарчай частцы і вучэбна-выхаваўчай працы.

За працоўныя поспехі Віктар Іванавіч Базылеўскі неаднаразова адзначаўся граматамі гарадскога, раённага, абласнога і рэспубліканскага ўзроўняў.

Матэрыял падрыхтаваны паводле інфармацыі, прадастаўленай Гомельскім аддзяленнем ГА “ВФКіС” у 2012 г.