Ландшафтны заказнік рэспубліканскага значэння "Чарневіцкі" ў міжрэччы Бярэзіны, Бабра і Ушы (Бярэзінскі, Барысаўскі і Крупскі раёны Мінскай вобласці) быў створаны ў 2005 г.

Плошча ахоўнай тэрыторыі складае больш за 10 тыс. га. Рэльеф у асноўным нізінны, сустракаюцца марэнныя пагоркі, старажытныя азёрныя катлавіны, буйныя леса-балотныя масівы з вярховымі, нізіннымі і пераходнымі балотамі. Большая частка тэрыторыі пакрыта хваёвымі, яловымі і бярозавымі лясамі. Зрэдку трапляюцца чорная і шэрая алешыны, асіны, вербы. Узрост асобных дрэў у пойменных дубровах перавышае 200 гадоў. Флора прадстаўлена 526 відамі сасудзістых раслін, з якіх вярба чарнічная, баранец звычайны, тайнік яйцападобны занесены ў Чырвоную кнігу Рэспублікі Беларусь. Маюцца значныя запасы гаспадарча-каштоўных раслін – валяр’яну лекавага, гудаеры паўзучай, падтынніку вялікага, крываўніку звычайнага, крушыны, чорнай парэчкі і інш. Заказнік насяляюць дзікі, ласі, лісы, тхары, зайцы. Сярод ахоўных відаў фаўны – барсук, шэры журавель, беласпінны дзяцел. На тэрыторыі знаходзіцца геалагічная славутасць – помнік прыроды рэспубліканскага значэння “Агаленне Мурава” (Бярэзінскі раён).

Заказнік з’яўляецца аб’ектам экалагічнага турызму. У вызначаныя тэрміны ў ім дазволена паляванне.

Матэрыял падрыхтаваны ў 2023 г.