Васiль Пятровiч Жушма нарадзіўся ў в. Хамічава Іванаўскага раёна Брэсцкай вобласці. Закончыў Хамічаўскую васьмігадовую, Махроўскую сярэднюю школы, факультэт фізічнага выхавання Брэсцкага педагагiчнага інстытута, аддзяленне журналістыкі Мінскай вышэйшай партыйнай школы. Работу ў прэсе пачаў няштатным карэспандэнтам абласной газеты “Заря” і Іванаўскай раённай “Чырвонай звязды”. Працаваў у рэспубліканскіх газетах “Физкультурник Белоруссии”, “Знамя юности”, з 1978 г. – загадчыкам аддзела аграрнай палітыкі ў “Чырвонай звяздзе”. Займаўся таксама асвятленнем пытанняў прамысловасці, экалогіі, культуры, фізічнай культуры і спорту.

Васіль Пятровіч аўтар нарысаў у зборніку "Папараць-кветка" (1991), якія праілюстраваны яго каляровымі фотаздымкамі пад назвай “У лясах пад Ясельдай”. Менавіта захапленне фотапаляваннем прывяло В. Жушму ў літаратуру. Яго аповесць "Гарэза" стала вынікам больш дзесяцігадовага вандравання па лясах Беларусі: пехатой, з фотаапаратам і без яго, з назіраннем за ўсім, што адбываецца ў прыродзе, з любоўю і фантазіяй. Упершыню аповесць была апублікавана ў часопісе “Маладосць” у 1994 г. У 2011 г. яна выйшла асобнай кніжкай у выдавецтве “Мастацкая літаратура”. Васіль Пятровіч з’яўляецца таксама аўтарам рэцэнзій на кнігі беларускіх пісьменнікаў (апублікаваны ў часопісах "Маладосць", "Першацвет", газеце "Літаратура і мастацтва", у іншых абласных і рэспубліканскіх выданнях). Яго творы на працягу некалькіх гадоў змяшчаюцца ў школьных падручніках для розных класаў. Нарыс «Як "папялушка" стала "прынцэсай"» прызнаны лепшым у рэспубліканскім літаратурным конкурсе на экалагічную тэматыку за 2004 г.

Васiль Жушма з’яўляецца членам Саюза пісьменнікаў Беларусі, Беларускага саюза журналістаў. Ён – лаўрэат многіх рэспубліканскіх і міжнародных фотаконкурсаў, аўтар персанальных фотавыставак у Брэсце, Пінску і Іванаве, пераможца рэспубліканскага фотаінфармацыйнага тэлевізійнага конкурса, прысвечанага Алімпійскім гульням у Маскве, і абласнога спаборніцтва сярод рэдакцый абласных, аб'яднаных раённых і гарадскіх газет, тэлебачання і радыё, прафесійных журналістаў у 2007 г. у намінацыі "Лепшы фотакарэспандэнт".

Матэрыял падрыхтаваны ў 2012 г. Іванаўскай цэнтральнай раённай бібліятэкай імя Ф.І. Панфёрава.