Палацава-паркавы комплекс Святаполк-Чацвярцінскіх знаходзіцца ў пасёлку Жалудок Шчучынскага раёна Гродзенскай вобласці. Велічны двухпавярховы будынак з мноствам вітражных вокнаў у стылі неабарока быў узведзены варшаўскім архітэктарам Уладзіславам Марконі ў пачатку ХХ ст. Парадны ўваход палаца вылучаны вялікім балконам на чатырох парных калонах, з боку двара знаходзіцца вялікая тэраса, на якую выходзілі парадныя памяшканні. У цэнтры будынка размяшчалася прасторная зала і вестыбюль з масіўнай лесвіцай. Пакоі палаца з высокімі столямі ўпрыгожвала ляпніна, мармуровыя каміны, вялікія двухстворкавыя дзверы. У склад сядзібнага комплексу ўваходзіў парк рэгулярнага тыпу, флігель, млын, сажалка і некалькі гаспадарчых пабудоў. Сям’я Святаполк-Чацвярцінскіх пражыла тут да 1939 г. Палац не быў пашкоджаны падчас Першай сусветнай вайны, уцалеў ён і ў Вялікую Айчынную вайну. У пасляваенны час уладальнікамі сядзібы спачатку былі вайскоўцы, затым іншыя, далёкія ад культуры і архітэктуры ўстановы, і яна паступова прыходзіла ў заняпад. У 2000-я гг. вядомасць гэтаму месцу прынеслі кінематаграфісты. Тут здымалася містычная карціна “Масакра” (рэж. А. Кудзіненка), кароткаметражны фільм “Дом” (рэж. А. Лобач) і адзін з кліпаў Алены Ланской. У 2014 г. палацава-паркавы комплекс стаў прыватнай уласнасцю.

Матэрыял падрыхтаваны ў 2022 г.