Прадпрыемства вядзе сваю гісторыю з кастрычніка 1939 г., калі ў Кобрыне (Брэсцкая вобласць) пачаў працаваць невялікі маслазавод. Вытворчасць была абсталявана рухавіком маркі “Diesel” магутнасцю ў 12 конскіх сіл і паравым катлом. Выраблялі тут сыр “Бакштэйн” і кісламалочнае масла. У ваенны перыяд завод быў разбураны. Сваю працу ён аднавіў у жніўні 1944 г. Невялікі калектыў у кароткія тэрміны наладзіў выпуск масла, тварагу і сыру. У наступныя гады прадпрыемства было поўнасцю механізавана і яго вытворчыя магутнасці значна павялічыліся. У 1967 г. узведзены новыя карпусы з сучасным абсталяваннем, якое дазволіла перапрацоўваць 50 т малака за змену. Да прадпрыемства былі далучаны філіялы ў Антопалі, Дзівіне і Драгічыне (Брэсцкая вобласць). У 1996 г. завод акцыянавалі. На ім пачалася мадэрнізацыя вытворчасці: запушчаны ў эксплуатацыю больш за 100 халадзільных установак, абсталяванне па выпуску плаўленых сыроў, лініі па ўпакоўцы сыру і вытворчасці тварагу. З 2004 г. прадпрыемства стала выпускаць прадукцыю пад гандлёвай маркай “Кобрынскія сыры”.

У цяперашні час адкрытае акцыянернае таварыства “Кобрынскі масларобна-сыраробны завод” – адно з вядучых прадпрыемстваў малочнай галіны Беларусі ў складзе холдынга “Канцэрн Брэстмясамалпрам”. Яно ўкамплектавана сучасным аўтаматызаваным абсталяваннем, якое дазваляе перапрацоўваць да 500 т малака за суткі. Завод выпускае больш за 150 відаў малочнай прадукцыі (сыр, малако, масла, маянэз, тварог, смятану, кефір, марожанае, гарчыцу, сухія малочныя сумесі, сухія сумесі для спецыялізаванага харчавання), якая з’яўляецца шматразовым прызёрам конкурсаў “Малочны поспех”, “Лепшы прадукт”, “Лепшыя тавары Рэспублікі Беларусь”, “Лепшыя тавары Рэспублікі Беларусь на рынку Расійскай Федэрацыі” і інш. Прадпрыемства стала лаўрэатам Прэміі Урада Рэспублікі Беларусь за дасягненні ў галіне якасці (2002, 2012, 2017, 2020, 2023) і прэміі Садружнасці Незалежных Дзяржаў за дасягненні ў галіне якасці прадукцыі і паслуг (2023).

Матэрыял падрыхтаваны ў 2024 г.