Гідралагічны заказнік рэспубліканскага значэння “Карыценскі Мох” быў створаны на тэрыторыі Смалоўскага і Пальмінскага лясніцтваў (Гарадоцкі раён Віцебскай вобласці) у 1981 г. Мэтай заснавання стала захаванне ў натуральным стане балотных масіваў вярховага тыпу Карыценскі Мох і Чысцік-1.

Ахоўная тэрыторыя плошчай 1,38 тыс. га знаходзіцца ў межах Суражскай нізіны. Рэльеф азёрна-марэнны. У складзе флоры налічваецца больш за 200 відаў сасудзістых раслін. На балотах пераважаюць хваёва-кусцікава-сфагнавыя фітацэнозы, на мінеральных астравах – бярозавыя, яловыя, асінавыя і альховыя лясы. Сярод рэдкіх відаў расліннасці – журавіны драбнаплодныя, марошка прысадзістая, бяроза нізкарослая, тайнік яйцападобны і інш. Фаўна складаецца з 81 віда пазваночных жывёл. Тут жывуць лось, дзік казуля, куніца, ласка, лісіца, янотападобны сабака. Сустракаюцца ахоўныя віды: шэрая чапля, канюк, змеяед, барадатая кугакаўка. Зберагліся шматлікія такавішчы глушцоў.

Заказнік з’яўляецца аб’ектам экалагічнага турызму. Для наведвальнікаў распрацаваны пешыя і веласіпедныя маршруты, абсталяваны экалагічная сцежка, аглядная пляцоўка і зоны адпачынку. У вызначаныя тэрміны дазволена паляванне, рыбалка, збор ягад і грыбоў.

Матэрыял падрыхтаваны ў 2023 г.