Рэспубліканскі ландшафтны заказнік “Чырвоны Бор” быў створаны ў Расонскім і Верхнядзвінскім раёнах Віцебскай вобласці ў 1997 г. Мэтай заснавання стала зберажэнне ў прыродным стане ўнікальных прыродных ландшафтаў і экасістэм. У 2010 г. ён атрымаў міжнародны статус ключавой арніталагічнай тэрыторыі.

Ахоўныя ўгоддзі плошчай 35 тыс. га ўяўляюць вялікі лясны масіў з мазаічнымі ўкрапінамі мноства вярховых балот, азёр, маляўнічых малых рэчак. З-за моцнай забалочаннасці і слаба развітай дарожнай сеткі, “Чырвоны Бор” з’яўляецца адной з найменш наведваемых чалавекам мясцін Беларусі. Асаблівы каларыт яму надаюць формы рэльефа ледавіковага паходжання – марэнныя ўзгоркі, грады, дзюнавыя комплексы. У заказніку дамінуюць лясныя ландшафты, якія пакрываюць больш за 80% тэрыторыі. Пераважаюць старыя ельнікі і хвойнікі, па паніжэннях – алешнікі. Большая частка балот адносіцца да вярховага тыпу, нізінныя балоты размешчаны ў поймах рэк і ля падножжаў узгоркаў. У заказніку 39 азёр агульнай плошчай больш за 3 тыс. га, большасць з якіх мае чыстую, празрыстую ваду і небагаты, але ўнікальны жывёльны і раслінны свет.

Флора сасудзістых раслін заказніка налічвае 699 відаў. Сустракаюцца ахоўныя – палушнік азёрны, лабелія Дортмана, нітэлопсіс прытуплены, бяроза карлікавая, шпажнік чарапіцавы, лінея паўночная, марошка прысадзістая і інш. Прыродны комплекс насяляюць зубр, буры мядзведзь, алень, казуля, лось, барсук, рысь, воўк, выдра, янотападобны сабака. Асаблівая каштоўнасць тэрыторыі заключаецца ў наяўнасці вялікай колькасці глушца, белабровага дразда, даўгахвостай кугакаўкі, касманогага сыча. Сустракаюцца таксама рэдкія віды – звычайны гогаль, кулік-селянец, сярэдні кулон, залацісты сявец, арол-маркут, скапа, вялікі грыцук, арол-вужаед, арлан-белахвост, чорны бусел і інш. Тут знаходзяцца адзінкавыя на Беларусі месцы гнездавання рэліктавых вадаплаўных птушак – чорнаваллёвай гагары і вялікага савука.

Заказнік з’яўляецца аб’ектам экалагічнага турызму. На тэрыторыі маюцца турыстычныя комплексы і аграсядзібы. Для наведвальнікаў праводзяцца пешыя і водныя экскурсіі, сафары-туры, абсталяваны экалагічныя сцежкі, аглядныя пляцоўкі, хаткі-хованкі для назіранняў за жывёламі. У вызначаныя тэрміны дазволена паляванне, рыбная лоўля, збор грыбоў і ягад.

Матэрыял падрыхтаваны ў 2023 г.