Даследчык нетраў зямлі, першаадкрывальнік шэрага буйных радовішчаў золата, арганізатар геалагічнай службы інжынер-геолаг Сяргей Дзмітрыевіч Ракоўскі ўнёс значны ўклад у асваенне прыродных багаццяў Калымы. Нарадзіўся ён у Магілёве. У пачатку XX ст. разам з бацькамі пераехаў у г. Троіцкасаўск у Забайкаллі. Пасля заканчэння ў 1918 г. рэальнага вучылішча ўступіў у Чырвоную Армію, змагаўся з белагвардзейцамі ў Забайкаллі і на Далёкім Усходзе. Дэмабілізаваўшыся С. Ракоўскі паступіў на геалагічны факультэт Іркуцкага політэхнічнага інстытута. У час вучобы выязджаў у складзе арцелі старацеляў на Алданскія прыіскі. Менавіта тут ён атрымаў першыя навыкі ў пошуках радовішчаў золата, навучыўся хутка і бясшумна хадзіць па тайзе, пачаў вывучаць якуцкі язык. Атрымаўшы дыплом горнага інжынера-геолага ў 1928 г., С. Ракоўскі працаваў у геалагічных партыях і экспедыцыях па пошуках золата ў шэрагу радовішчаў. Некаторы час быў прарабам пошукавых і разведачных работ, памочнікам начальніка геолага-пошукавай партыі. У 1928–1929 гг. працаваў прарабам першай Калымскай экспедыцыі, якая адкрыла прамысловую залатаноснасць басейна р. Калымы. З 1930 г. удзельнічаў у арганізацыі геалагічнай службы і правядзенні геолагаразведачных работ у Магаданскай вобласці. Доўгі час быў кіраўніком Верхнекалымскай геалагічнай экспедыцыі, якая выявіла запасы золата ў прытоках р. Нера. У гады Вялікай Айчыннай вайны С. Ракоўскі ўзначальваў Янскі, Індыгірскі раённыя геолагаразведачныя ўпраўленні. Пад яго кіраўніцтвам былі адкрыты буйное руднае і багацейшае россыпнае радовішча золата ў басейне р. Амчак. Уступілі ў дзеянне новыя прыіскі імя Варашылава, Будзённага, Цімашэнкі, Гастэлы. Сталі дабываць золата на прыіску «Победа». У час вайны для авіявытворчасці патрэбна было волава – стратэгічны і рэдкі метал. З удзелам С. Ракоўскага ствараецца новы прыіск. Дзякуючы прафесійным ведам і пошукавым навыкам геолага быў атрыманы бясцэнны метал. Да 1959 г. С. Ракоўскі распрацоўваў новыя метады пошукаў, адкрываў радовішчы каштоўных металаў.

За працоўныя поспехі ён узнагароджаны ордэнамі Леніна і Працоўнага Чырвонага Сцяга. У 1946 г. стаў лаўрэатам Дзяржаўнай прэміі СССР за адкрыццё радовішчаў золата ў Магаданскай вобласці і Якуціі. У гонар выдатнага геолага ў г. Сусуман, пасёлках Багатай, Нексікам, Усць-Нера, Ягаднае названы вуліцы, а таксама ручай ў Сярэднеканскім раёне, парог на р. Бахапча Ценькінскага раёна.

Матэрыял падрыхтаваны ў 2019 г.