Міжнародны фестываль дзіцячай творчасці «Залатая пчолка» – свята юных талентаў, якое традыцыйна праходзіць напярэдадні Міжнароднага Дня абароны дзяцей. Ён аб'ядноўвае танцораў, спевакоў, музыкантаў і мастакоў з Беларусі, Расіі, Украіны, Малдовы, Казахстана, Кіргізіі, Балгарыі, Польшчы, Румыніі, Турцыі, Кітая і Нарвегіі. За сваю нядоўгую гісторыю «Залатая пчолка» запаліла шмат яркіх зорачак і стала своеасаблівым творчым трамплінам для таленавітых дзяцей.

Першы міжрэгіянальны фестываль адбыўся 1 чэрвеня 1996 г. у Клімавічах пры падтрымцы дабрачыннай арганізацыі «Лайонс-клуб». У мерапрыемстве прынялі ўдзел прадстаўнікі некалькіх раёнаў Беларусі і Расіі. Ініцыятарам дзіцячага форуму з’яўляўся І.А. Баршчоў (на той час намеснік старшыні Клімавіцкага райвыканкама). У 1997 г. фестывалю была прысвоена гучная назва «Залатая пчолка», і невыпадкова: пчала намалявана на гербе г. Клімавічы. У 1999 г. фестываль атрымаў статус абласнога, у 2001 г. стаў міжнародным. Сёння яго заснавальнікамі з'яўляюцца Міністэрства культуры, Магілёўскі аблвыканкам, упраўленне культуры аблвыканкама і Клімавіцкі райвыканкам.

Першы Міжнародны фестываль дзіцячай творчасці «Залатая пчолка» праводзіўся ў 2001 г., калі ААН аб'явіла Дзесяцігоддзе культуры міру і ненасілля ў інтарэсах дзяцей. Клімаўшчына сустракала жаданых гасцей не толькі з Беларусі, але і з Расіі і Малдовы. Свята сабрала каля 500 удзельнікаў. Потым да іх далучыліся дэлегацыі з Украіны, Латвіі, Кіргізіі, Казахстана.

Да ўдзелу ў конкурсе запрашаюцца дзіцячыя калектывы і дзеці ва ўзросце ад дзевяці да шаснаццаці гадоў з Рэспублікі Беларусь і замежных краін. Конкурсныя выпрабаванні складаюцца з адборачнага і заключнага тураў. Папярэдні адбор ажыццяўляе аргкамітэт і экспертна-мастацкая група пасля прагляду заявак, відэа-аўдыё матэрыялаў і работ дэкаратыўна-прыкладнога выяўленчага мастацтва. Конкурс праводзіцца ў дзвюх узроставых катэгорыях – малодшая (9–12 гадоў уключна) і старэйшая (13–16 гадоў). «Залатая пчолка» мае шэраг намінацый: «Вакальнае мастацтва», «Харэаграфічнае мастацтва», «Выяўленчае мастацтва», «Дэкаратыўна-прыкладное мастацтва».

«Залатая пчолка» – шматжанравы фестываль. Юныя таленты спаборнічаюць у вакальным, харэаграфічным, інструментальным і цыркавым мастацтве. Конкурсная праграма, як правіла, праходзіць у раённым цэнтры культуры. Акрамя таго, у гарадскім парку працуюць дзіцячыя атракцыёны, працуюць гандлёвыя кропкі з падарункамі і сувенірамі. Госці фестывалю з задавальненнем наведваюць традыцыйную мастацкую выстаўку «Чырвоныя фарбы дзяцінства», выстаўку-студыю дэкаратыўна-прыкладнога мастацтва «Акадэмія дзіцячай творчасці». Штогод праводзіцца дзіцячы пленэр «З мальбертам па родным краі». Акрамя ўдзелу ў конкурснай праграме, «залатыя пчолкі» выступаюць на адкрытых пляцоўках Клімавіч. Фіналам двухдзённага свята становіцца гала-канцэрт пераможцаў, гасцей і феерверк.

Матэрыял падрыхтаваны Магілёўскай абласной бібліятэкай імя У.І. Леніна ў 2013 г.