Алена Пятроўна Мацярынка нарадзілася ў Магілёве. У 1981 г. паступіла ў дзіцячую музычную школу № 3 (клас віяланчэлі). У 1991 г. стала студэнткай музычна-педагагічнага факультэта Магілёўскага педагагічнага інстытута імя А.А. Куляшова (зараз Магілёўскі дзяржаўны ўніверсітэт імя А.А. Куляшова). Пасля заканчэння А. Мацярынка пачала працаваць у Магілёўскай абласной філармоніі.У хуткім часе стала вядучым майстрам сцэны, салісткай аркестра народных інструментаў імя Л.Л. Іванова. У 1998 г. яна паступіла адразу на другі курс Магілёўскага філіяла Беларускай дзяржаўнай акадэміі музыкі.

У 1998 г. на рэспубліканскім конкурсе вакалістаў імя Л. Александроўскай А. Мацярынка была ўзнагароджана спецыяльным прызам “Лепшы голас”. На маскоўскім міжнародным конкурсе маладых выканаўцаў рускага раманса “Романсиада” (1999) атрымала ІІ-ю прэмію і званне лаўрэата. У 2003 г. стала лаўрэатам міжнароднага фестывалю духоўнай музыкі “Магутны божа”. Яна кожны год прымае ўдзел у міжнародных фестывалях “Беларуская музычная восень”, “Магілёўская музычная вясна”, “Калядны фестываль” і інш.

Спявачка з'яўляецца першай у гісторыі Магілёва прафесійнай акадэмічнай вакалісткай, якая нарадзілася, атрымала адукацыю і працуе ў родным горадзе. Творчую дзейнасць сумяшчае з педагагічнай у якасці выкладчыка вакалу ў Магілёўскім дзяржаўным універсітэце імя А.А. Куляшова і Магілёўскай гімназіі-каледжы музыкі і харэаграфіі.

У 2008 г. А. Мацярынка ўзнагароджана медалём імя Ф. Скарыны.

Матэрыял падрыхтаваны УК “Магілёўская абласная бібліятэка імя У. І. Леніна” ў 2017 г.