Анжаліка Анатольеўна Агурбаш нарадзілася ў Мінску. У 1987 г. паступіла на акцёрскае аддзяленне Беларускага дзяржаўнага тэатральна-мастацкага інстытута, дзе вучылася на курсе народнай артысткі Беларусі Л. М. Давідовіч. У 1988 г. стала пераможцай у конкурсе прыгажосці «Міс Беларусь», пазней атрымала тытул «Міс фота СССР» (1991) і «Місіс Расія» (2002). Самым знамянальным конкурсам, які прынёс вядомасць і шматлікія прапановы аб супрацоўніцтве А. Агурбаш лічыць першы. Пасля яго яна ўдзельнічала ў шматлікіх канцэртах, знімалася ў фільмах. З 1990 па 1995 г. спявала ў вакальна-інструментальным ансамблі «Верасы», мастацкім кіраўніком якога быў кампазітар В. Раінчык.

У 1996 г. А. Агурбаш пачала сольную праграму (яе прадзюсарам быў народны артыст Расіі Л. Лешчанка). Першым самастойным творчым поспехам стаў дыск «Бумажная луна» (1995), праз два гады з'явіўся другі – «Ночи без сна». У гэты ж час спявачка арганізавала ў Мінску арт-клуб «Ліка», у які ўвайшлі прадстаўнікі тэатральнага, эстраднага і музычнага мастацтва. У 1999 г. яна закончыла Інстытут сучасных ведаў імя А.М. Шырокага і стала прадзюсарам музычных шоу-праграм і педагогам музыкі. Кіравала рознымі творчымі праектамі, займалася дабрачыннай і канцэртнай дзейнасцю. Удзельнічала ў прэстыжных расійскіх шоу: творчым вечары кампазітара І. Крутога, «Авацыя», «Песня года»; вяла перадачы «Завтрак с Ликой» (СТВ) і «Премьера песни» (БТ). У 2003 г. А. Агурбаш запісала песню «Белая Русь», якая ўпершыню была выканана на «Славянскім базары» ў Віцебску. Потым з'явілася кампазіцыя «Посвящение Евфросинии Полоцкой», прэм'ера якой адбылася ў Полацку на святкаванні Дня беларускай пісьменнасці. Анжаліка Агурбаш удзельнічала ў многіх музычных форумах. Яна з'яўляецца лаўрэатам фестываляў «Залаты шлягер», «На скрыжаваннях Еўропы», «Залаты грамафон», «Песня года», прадстаўляла Беларусь на конкурсе песні «Еўрабачанне-2005», дзе яе прадзюсарам быў Ф. Кіркораў. У 2006 г. А. Агурбаш стала заслужанай артысткай Беларусі, у 2016 г. атрымала званне «Народная артыстка Беларусі».

Матэрыя падрыхтаваны ў 2017 г.