Серафіма Паўлаўна Тарашкевіч нарадзілася ў сяле Кавалевічы Пухавіцкага раёна ў мнагадзетнай сям’і. Малалетнім дзіцём перажыла акупацыю вёскі войскамі кайзераўскай Германіі ў лютым – снежні 1918 г. і польскай арміяй у жніўні 1919 – ліпені 1920 г.

Калі ў 1929 г. у Кавалевічах быў арганізаваны калгас «Чырвоны пуцілавец», Серафіма Тарашкевіч уступіла ў яго адной з першых. Ахвотна бралася за любую работу і ў паляводстве, і ў жывёлагадоўлі. Пэўны час працавала даяркай, пасля пабудовы калгаснай свінафермы стала свінаркай.

У час Вялікай Айчыннай вайны муж Серафімы Тарашкевіч пайшоў у партызаны, а яна з малымі дзецьмі амаль тры гады была вымушана хавацца ў лясах і балотах.

Пасля вызвалення раёна ў ліпені 1944 г. Серафіма Паўлаўна стала працаваць у калгасе «Маяк сацыялізму» Рудзенскага пасялковага савета. Прымала актыўны ўдзел у аднаўленні калгаснай вытворчасці, працавала ў паляводстве. У пасляваенны час асноўнай спецыялізацыяй гаспадаркі стала вырошчванне новай тэхнічнай культуры – кок-сагызу. Пад новую культуру былі вызначаны спецыяльныя ўчасткі, для яе вырошчвання створаны спецыялізаваныя звёны. Серафіма Тарашкевіч узначаліла адно з іх.

У 1949 г. Серафіма Паўлаўна з сяброўкамі сабрала ў сярэднім па 62 цэнтнеры каранёў кок-сагызу з кожнага гектара, за што была ўзнагароджана ордэнам Леніна. У наступным годзе калгас «Маяк сацыялізму» ў два разы перавыканаў дзяржаўны план па ўраджайнасці каўчуканосных культур. Каўчукаводы на чале з Серафімай Тарашкевіч вырасцілі рэкордны ўраджай – па 90,6 цэнтнераў з гектара, што стала самым высокім паказчыкам у Беларусі.

Указам Прэзідыума Вярхоўнага Савета СССР ад 18 мая 1951 г. за атрыманне ў 1950 г. высокіх ураджаяў каранёў кок-сагызу Серафіме Паўлаўне Тарашкевіч было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат». За атрыманне ў 1951 г. высокіх ураджаяў каранёў кок-сагызу Серафіма Паўлаўна была ўзнагароджана трэцім ордэнам Леніна.

Серафіма Тарашкевіч працавала ў калгасе да выхаду на заслужаны адпачынак у 1962 г. Узнагароджана трыма ордэнамі Леніна, медалямі.

Пераклад 2021 г. матэрыялаў інтэрнэт-праекта «Герои страны».