Алімпіяда Адамаўна Трыгубовіч нарадзілася ў засценку Ленявічы (цяпер вёска Харытонаўка Капыльскага раёна Мінскай вобласці) у сям’і сялян.

Пасля заканчэння пачатковай школы працавала ў калгасе “Чырвоны баец”. Перажыла нямецка-фашысцкую акупацыю. Пасля вызвалення Капыльскага раёна прымала актыўны ўдзел у аднаўленні разбуранага калгаса. Працавала ў паляводстве, на жывёлагадоўчай ферме.

У 1960 г. А.А. Трыгубовіч перайшла на свінагадоўчую ферму. Спачатку даглядала групу ў 150 парсючкоў, затым яе група складалася з пяці соцень жывёл, а праз пэўны час дасягла тысячы.

Алімпіяда Адамаўна набіралася вопыту і хутка стала прызнаным майстрам сваёй справы. У 1963 г. яна выгадавала 965, у 1964 г. – 1010, а ў 1965 г. – 1095 парсючкоў.

Указам Прэзідыума Вярхоўнага Савета СССР ад 22 сакавіка 1966 г. за дасягнутыя поспехі ў развіцці жывёлагадоўлі, павелічэнні вытворчасці і нарыхтовак мяса, малака, яек, воўны і іншай прадукцыі Алімпіядзе Адамаўне Трыгубовіч было прысвоена званне Героя Сацыялістычнай Працы з уручэннем ордэна Леніна і залатога медаля “Серп і Молат”.

Алімпіяда Трыгубовіч працавала жывёлаводам да выхаду на заслужаны адпачынак у 1971 г. Прымала актыўны ўдзел у грамадскім жыцці, выбіралася дэпутатам Вярхоўнага Савета Беларускай ССР, мясцовых Саветаў дэпутатаў працоўных. Узнагароджана ордэнам Леніна, медалямі. Імя А.А. Трыгубовіч занесена ў Кнігу народнай славы Капыльскага раёна.

Пераклад 2021 г. матэрыялаў інтэрнэт-праекта “Герои страны”.