Анатоль Панцялеевіч Шлопак нарадзіўся ў Мінску ў сям’і рабочага.

Працаваў оптыкам-механікам у канструктарскім бюро № 5 (КБ-5) навукова-даследчага інстытута № 350 у складзе 6-га галоўнага ўпраўлення Дзяржаўнага камітэта Савета Міністраў СССР па электроннай тэхніцы. КБ-5 было створана ў лістападзе 1962 г. у Мінску, галоўным напрамкам яго дзейнасці з’яўлялася распрацоўка і арганізацыя вытворчасці абсталявання для фоталітаграфічных працэсаў і зборачных аперацый у працэсе вытворчасці інтэгральных схем і іншых вырабаў мікраэлектронікі. Анатолій Панцялеевіч займаўся вырабам вопытных узораў для распрацоўкі абсталявання для вытворчасці фоташаблонаў і правядзення аперацый сумяшчэння і экспанавання на паўправадніковых пласцінах, а таксама абсталявання для зборкі інтэгральных і гібрыдных схем.

У кастрычніку 1966 г. КБ-5 было ператворана ў канструктарскае бюро дакладнага электроннага машынабудавання (КБДЭМ) у складзе 9-га галоўнага ўпраўлення Мінэлектронпрама СССР. У снежні 1970 года КБДЭМ увайшло ў склад навукова-вытворчага аб’яднання «Планар». У 1968 г. пры бюро было створана доследнае прадпрыемства «Электронмаш», якое стала асноўнай тэхналагічнай і вытворчай базай для вырабу вопытных і эксперыментальных узораў, спецыяльнага тэхналагічнага абсталявання, распрацаванага ў КБДЭМ.

З канца 1960-х гг. А.П. Шлопак удзельнічаў у распрацоўцы абсталявання для зборкі транзістараў, затым у распрацоўцы найноўшага абсталявання для вырабу паўправадніковых інтэгральных схем. Дамогся поспехаў у выкананні заданняў дзявятага (1971–1975) і дзясятага (1976–1980) пяцігадовых планаў развіцця народнай гаспадаркі.

У 1976 г. за дасягнутыя поспехі ў выкананні заданняў дзявятай пяцігодкі і сацыялістычных абавязацельстваў, павышэнне эфектыўнасці вытворчасці і якасці працы ўзнагароджаны ордэнам Працоўнай Славы III-й ступені.

У 1981 г. за паспяховае выкананне заданняў дзясятай пяцігодкі і сацыялістычных абавязацельстваў узнагароджаны ордэнам Працоўнай Славы II-й ступені.

Анатоль Панцялеевіч зарэкамендаваў сябе як высокакваліфікаваны спецыяліст. З канца 1970-х гг. удзельнічаў у стварэнні высокапрадукцыйных генератараў для перадачы выяў, якія выкарыстоўваюць лазеры, імпульсныя лямпы. Найбольш высокіх паказчыкаў дабіўся ў выкананні заданняў адзінаццатага пяцігадовага плана развіцця народнай гаспадаркі (1981–1985). За доўгія гады працы ў КБДЭМ і на заводзе «Электронмаш» праявіў сябе як творчы работнік, актыўна ўдзельнічаў у рацыяналізацыі і вынаходніцтве. За гады адзінаццатай пяцігодкі падаў шэсць рацыяналізатарскіх прапаноў, якія былі ўкаранёны ў вытворчасць са значным эканамічным эфектам.

У 1986 г. за поспехі, дасягнутыя ў выкананні заданняў адзінаццатай пяцігодкі і сацыялістычных абавязацельстваў, Анатолій Панцялеевіч Шлопак быў узнагароджаны ордэнам Працоўнай Славы I-й ступені і стаў поўным кавалерам ордэна Працоўнай Славы.

Анатоль Панцялеевіч працаваў на заводзе «Электронмаш» (цяпер ААТ «Завод «Электронмаш» у складзе холдынга «Планар») да выхаду на заслужаны адпачынак. Узнагароджаны ордэнамі Працоўнай Славы I-й (1986), II-й (1981) і III-й (1976) ступеняў, медалямі.

Пераклад 2021 г. матэрыялаў інтэрнэт-праекта «Герои страны».