Люцыян Васільевіч Сакоўскі нарадзіўся ў вёсцы Варацец (зараз не існуе) Хойніцкага раёна ў сям’і калгаснікаў.

У гады Вялікай Айчыннай вайны перажыў акупацыю. Пасля атрымання няпоўнай сярэдняй адукацыі ў мясцовай школе паступіў на вучобу ў Рудакоўскае вучылішча механізацыі сельскай гаспадаркі. Па яго заканчэнні працаваў на Рудакоўскай машынна-трактарнай станцыі. Дасканала авалодаў майстэрствам камбайнера і ўвайшоў у шэраг перадавых работнікаў гаспадаркі.

З 1957 г. стаў працаваць механізатарам у калгасе «Кастрычнік». Беражліва, па-гаспадарску ставіўся да тэхнікі, сістэматычна перавыконваў нормы выпрацоўкі, забяспечваў скарочаныя тэрміны ўборачнай кампаніі пры выдатнай якасці працы.

У перыяд восьмай і дзявятай пяцігодак Люцыян Васільевіч замацаваў за сабой славу перадавіка сельскагаспадарчай вытворчасці. Першым у раёне ўзяў сацыялістычныя абавязацельствы намалаціць за сезон тысячу тон збожжа і паспяхова справіўся з гэтай задачай.

Указам Прэзідыума Вярхоўнага Савета СССР ад 12 снежня 1973 г. за вялікія поспехі, дасягнутыя ва Усесаюзным сацыялістычным спаборніцтве, і праяўленую працоўную доблесць у выкананні прынятых абавязацельстваў па павелічэнні вытворчасці і продажу дзяржаве збожжа, бульбы, цукровых буракоў і іншых прадуктаў земляробства ў 1973 г. Люцыяну Васільевічу Сакоўскаму прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Высокіх намалотаў Люцыян Васільевіч дамогся і ў завяршальныя гады дзявятай пяцігодкі. Працягваў займацца адукацыяй, завочна скончыў Чырвонабярэжскі сельскагаспадарчы тэхнікум. Актыўна займаўся настаўніцтвам. У 1977 г. атрымаў ганаровае званне «Заслужаны настаўнiк працоўнай моладзі Беларускай ССР», меў званне «Заслужаны работнiк сельскай гаспадаркі Беларускай ССР».

Люцыян Васільевіч Сакоўскі працаваў механізатарам да скасавання калгаса ў жніўні 1986 г. у сувязі з радыяцыйным забруджваннем тэрыторыі пасля катастрофы на Чарнобыльскай АЭС. Выбіраўся дэпутатам Рудакоўскага сельскага Савета дэпутатаў працоўных. Узнагароджаны ордэнамі Леніна, Працоўнага Чырвонага Сцяга, медалямі.

Пераклад 2021 г. матэрыялаў інтэрнэт-праекта «Герои страны».