Васіль Данілавіч Махновіч нарадзіўся ў вёсцы Варажбіты Бярозаўскага раёна Брэсцкай вобласці. Удзельнік Вялікай Айчыннай вайны, у 1944 г. у баях ва Усходняй Прусіі атрымаў цяжкае раненне. Пасля лячэння і дэмабілізацыі быў грузчыкам, качагарам. У 1951 г. В.Д. Махновіч стаў працаваць у будаўнічым трэсце № 8 горада Брэста. Авалодаў прафесіямі муляра, цесляра, бетоншчыка, мантажніка. Праз тры гады ўзначаліў комплексную будаўнічую брыгаду, якая пабудавала дваццаць аб’ектаў аховы здароўя і адукацыі, шэраг вытворчых збудаванняў на панчошным і дывановым камбінатах, некалькі будынкаў праектных інстытутаў, больш за 100 000 квадратных метраў жылля.

Указам Прэзідыума Вярхоўнага Савета СССР ад 7 мая 1971 г. за дасягненне высокіх вытворчых паказчыкаў Васілю Данілавічу Махновічу прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Увесь час у брыгадзе Махновіча вялася падрыхтоўка маладых будаўнікоў. Толькі за 1965–1970 гг. непасрэдна на вытворчасці было падрыхтавана да прафесійнай працы 126 маладых рабочых. У 1981 г. Васіль Данілавіч стаў заслужаным настаўнікам працоўнай моладзі БССР.

З 1985 г. В.Д. Махновіч знаходзіўся на заслужаным адпачынку. Узнагароджаны ордэнамі Леніна (1971), Айчыннай вайны І-й ступені (1985), двума ордэнамі Працоўнага Чырвонага Сцяга (1958, 1973), медалямі. Ганаровы грамадзянін Брэста. Імя Героя носіць адна з вуліц абласнога цэнтра.

Пераклад 2021 г. матэрыялаў інтэрнэт-праекта «Герои страны».