Іван Данілавіч Пашкевіч нарадзіўся ў горадзе Орша Віцебскай вобласці ў сям’і рабочых. З дзесяцігадовага ўзросту працаваў пастухом.

Пасля заканчэння курсаў працаваў тынкоўшчыкам на будаўніцтве мясакансервавага камбіната. У 1930–1937 гг. быў супрацоўнікам Аршанскага мясакамбіната, дзе займаўся апрацоўкай туш буйной рагатай жывёлы. Быў стаханаўцам, зменныя нормы выпрацоўкі выконваў на 130–140 працэнтаў, узнагароджаны знакам “Отличник социалистического соревнования Наркоммясомолпрома СССР”. У 1938 г. стаў інструктарам школы фабрычна-заводскага вучнёўства.

У час Вялікай Айчыннай вайны Іван Пашкевіч быў намеснікам палітрука стралковага палка на Ленінградскім фронце. У 1942 г. пасля цяжкага ранення дэмабілізаваны з арміі па інваліднасці і некаторы час працаваў на Омскім мясакансервавым камбінаце.

У 1944 г. вярнуўся ў родны горад на ранейшае месца працы. Прымаў актыўны ўдзел у аднаўленні вытворчасці. Арганізаваў на камбінаце школу фабрычна-заводскага навучання, быў яе дырэктарам, затым інструктарам вытворчага навучання. За 10 гадоў Іван Данілавіч падрыхтаваў каля 250 маладых рабочых, многія з якіх у далейшым засталіся працаваць на мясакамбінаце. У 1957 г. зноў вярнуўся на мясакамбінат, дзе працаваў да выхаду на заслужаны адпачынак.

Указам Прэзідыума Вярхоўнага Савета СССР ад 14 чэрвеня 1966 г. за асаблівыя заслугі ў выкананні заданняў сямігадовага плана і дасягненне высокіх тэхніка-эканамічных паказчыкаў па вытворчасці мясных прадуктаў Івану Данілавічу Пашкевічу прысвоена званне Героя Сацыялістычнай Працы з уручэннем ордэна Леніна і залатога медаля “Серп і Молат”.

Іван Данілавіч быў актыўным удзельнікам грамадскага жыцця камбіната і горада. Выбіраўся дэпутатам Аршанскага гарадскога Савета дэпутатаў працоўных. Узнагароджаны ордэнамі Леніна, Айчыннай вайны І-й ступені, ордэнам Славы ІІІ ступені, медалямі, знакамі “Отличник мясной и молочной промышленности” СССР (двойчы) і БССР (тройчы).

Пераклад 2021 г. матэрыялаў інтэрнэт-праекта “Герои страны”.