Сядзібна-паркавы ансамбль Бішэўскіх, які знаходзіцца ў пасёлку Лынтупы Пастаўскага раёна Віцебскай вобласці, быў пабудаваны ў пачатку ХХ ст. паводле праекта вядомага віленскага архітэктара Тадэвуша Раствароўскага. Існуе легенда аб каханні маладога шляхціца Юзафа Бішэўскага і парыжскай акторкі, для якой быў узведзены цудоўны двухпавярховы беласнежны будынак. Яго ўпрыгожвалі стройныя калоны, багатая ляпніна, раскошнае аздабленне. На тэрыторыі сядзібы размясціліся гаспадарчыя пабудовы, капліца, арачны мост, вялікая гранітная лесвіца з мармуровымі скульптурамі.

Палац з’яўляўся цэнтрам паркавай кампазіцыі. У парку раслі рэдкія дрэвы і кусты, былі створаны спецыяльныя пляцоўкі для назірання за маляўнічымі краявідамі, пабудаваны музычны павільён. Дзякуючы сістэме вадаёмаў з чатырох штучных сажалак, злучаных паміж сабой, стваралася ўражанне, што палац стаіць на востраве. Напэўна, французская прыгажуня не стрымала свайго абяцання, бо Ю. Бышэўскі так і не ажаніўся. Ён амаль не карыстаўся пакоямі ва ўласнай сядзібе, а пасяліўся побач з ёй у невялікім сціплым флігелі. У 1939 г. уладальнік назаўсёды пакінуў гэтыя мясціны, а палац быў разрабаваны.

У савецкі час тут размяшчалася школа, затым сядзіба доўга стаяла закінутай. У 2010 г. яе выкупіла прыватная расійская кампанія і зараз тут вядуцца аднаўленчыя работы.

Матэрыял падрыхтаваны ў 2022 г.