Уладзімір Тарасавіч Чуракоў нарадзіўся ў пасёлку Хутар Гомельскага раёна ў сялянскай сям’і. Скончыў 7 класаў сельскай школы.

У час Вялікай Айчыннай вайны разам з бацькамі знаходзіўся на акупіраванай тэрыторыі. Летам 1944 г. прыйшоў на Гомельскі дрэваапрацоўчы камбінат. Спачатку быў вучнем сталяра, потым стаў працаваць вытворцам шаблонаў. Выдатна скончыў профільную школу фабрычна-заводскага навучання. У час працы на камбінаце будаваў вытворчыя цэхі, жыллё. У 1947 г. падаў першую рацыяналізатарскую прапанову, якая дала магчымасць павысіць якасць працы.

У 1956 г. У.Т. Чуракоў перайшоў на працу ў эксперыментальную майстэрню мэблевага цэха, дзе асвоіў выраб новых узораў мэблі і аснасткі да абсталявання. У 1963 г. прыняў кіраўніцтва брыгадай эксперыментальнай майстэрні. Разам з падначаленымі выконваў і перавыконваў планавыя заданні пяцігодак пры выдатнай якасці прадукцыі і строгім захаванні тэхналагічных патрабаванняў. Зладжаная, творчая праца і прафесійнае майстэрства дазволілі сталярам брыгады Чуракова дасягаць высокіх вынікаў, распрацоўваць эксперыментальныя ўзоры мэблі для міжнародных выставак.

Указам Прэзідыума Вярхоўнага Савета СССР ад 7 мая 1971 г. за выдатныя вытворчыя поспехі ў выкананні заданняў пяцігадовага плана Уладзіміру Тарасавічу Чуракову было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

За гады працы на прадпрыемстве У.Т. Чуракоў укараніў больш за 150 удасканаленняў і вынаходак, якія далі камбінату вялікі эканамічны эфект, дапамаглі палепшыць умовы працы рабочых. У 1968 г. Уладзіміру Тарасавічу Чуракову было прысвоена ганаровае званне «Заслужаны рацыяналізатар Беларускай ССР».

Вялікую ўвагу майстар надаваў падрыхтоўцы маладых кадраў, перадаваў ім свой вопыт і веды, быў частым госцем у школах і прафесійна-тэхнічных вучылішчах, выступаў на радыё і тэлебачанні. Узнагароджаны двума ордэнамі Леніна, медалямі.

Пераклад 2021 г. матэрыялаў інтэрнэт-праекта «Герои страны».