Валянціна Сямёнаўна Вачынская нарадзілася ў вёсцы Бацюты Падляскага ваяводства Польшчы. З 1949 г. працавала ў калгасе «Расія» Гродзенскага раёна паляводам, брыгадзірам паляводчай брыгады, а з 1957 г. загадвала вытворчым участкам.

Дзякуючы ўкараненню перадавых тэхналогій і дасягненняў навукі Валянціна Вачынская дамагалася высокай ураджайнасці на палях. У 1971 г. з кожнага гектара паляводамі пад яе кіраўніцтвам было сабрана па 35 цэнтнераў збожжавых, па 201 цэнтнеру бульбы, па 317 цэнтнераў цукровых буракоў. У засушлівым 1972 г. яе ўчастак даў з кожнага гектара амаль па 27 цэнтнераў збожжавых, па 237 цэнтнераў бульбы, па 516 цэнтнераў цукровых буракоў. Валавая вытворчасць збожжа перавысіла 600 тон.

Указам Прэзідыума Вярхоўнага Савета СССР ад 13 снежня 1972 г. за вялікія поспехі, дасягнутыя ў павелічэнні вытворчасці і продажу дзяржаве збожжа, цукровых буракоў, іншых прадуктаў земляробства, і праяўленую працоўную доблесць на ўборцы ўраджаю Валянціне Сямёнаўне Вачынскай было прысвоена званне Героя Сацыялістычнай Працы з уручэннем ордэна Леніна і медаля «Серп і Молат».

З 1976 г. В.С. Вачынская працавала брыгадзірам паляводчай брыгады вучэбна-вопытнай гаспадаркі Гродзенскага сельскагаспадарчага інстытута. Неаднаразова выбіралася дэпутатам Вярхоўнага Савета БССР, сельскага і раённага Саветаў дэпутатаў працоўных. Узнагароджана двума ордэнамі Леніна, ордэнам «Знак Пашаны». Імем Валянціны Вачынскай названа вуліца ў вёсцы Путрышкі Гродзенскага раёна.

Пераклад 2021 г. матэрыялаў інтэрнэт-праекта «Герои страны».