Аляксандр Раманавіч Бобрык нарадзіўся ў вёсцы Готкавічы Маладзечанскага раёна Мінскай вобласці ў сям’і сялян. Змалку працаваў у бацькавай гаспадарцы, быў парабкам у суседзяў. Толькі чатыры зімы правучыўся хлапчук у мясцовай польскамоўнай школе.

У час Вялікай Айчыннай вайны сям’я Бобрыкаў заставалася на тэрыторыі, акупіраванай фашысцкай Германіяй, вынесла ўсе нягоды ваеннага часу. У 1945 г. А.М. Бобрык быў прызваны на тэрміновую службу ў рады Чырвонай Арміі і на працягу шасці гадоў вадзіў армейскі грузавік па дарогах Паволжа, Румыніі і Малдовы.

Пасля вяртання ў родныя Готкавічы Аляксандр Раманавіч уступіў у мясцовы калгас «Чырвоны сцяг», які ў студзені 1954 г. быў далучаны да суседняга калгаса «Светлы шлях». Працаваў шафёрам, механікам, а ў 1963 г. стаў кіраўніком комплекснай паляводчай брыгады колькасцю ў 120 чалавек. Займаўся самаадукацыяй, авалодваў агратэхнікай вырошчвання абганяльных культур, знаёміўся з перадавым вопытам земляробаў рэспублікі. У 1970 г. брыгада Бобрыка дамаглася рэкорднай ураджайнасці і намалаціла 1100 тон збожжа. Выдатна ўрадзіла бульба, цукровыя буракі і іншыя культуры.

Указам Прэзідыума Вярхоўнага Савета СССР ад 8 красавіка 1971 г. за выдатныя поспехі, дасягнутыя ў развіцці сельскагаспадарчай вытворчасці і выкананні пяцігадовага плана продажу дзяржаве прадуктаў земляробства і жывёлагадоўлі, Аляксандру Раманавічу Бобрыку было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Аляксандр Раманавіч паспяхова кіраваў брыгадай і ў наступныя гады. Да канца 1970-х гг. ураджайнасць збожжавых на яго палях пераваліла за 40, бульбы – за 300 і буракоў – за 360 цэнтнераў з гектара. Валавая вытворчасць жывёлагадоўчай прадукцыі з 1965 г. узрасла ў дзясяткі разоў.

Як наватар сельскагаспадарчай вытворчасці А.Р. Бобрык вёў настойлівую і карпатлівую працу па ўдасканаленні тэхналогіі вырошчвання сельскагаспадарчых культур, паляпшэнні культуры земляробства і правільнай арганізацыі працы паляводаў. Яго заслугі ў развіцці сельскай гаспадаркі былі адзначаны двума дыпломамі Галоўнага выставачнага камітэта ВДНГ СССР, ордэнамі Леніна, Працоўнага Чырвонага Сцяга, медалямі.

Пераклад 2021 г. матэрыялаў інтэрнэт-праекта «Герои страны».