Буцэвіч Ванда Антонаўна

Дата рождения: 15.05.1909 Рудзенск, в., Ігуменскі павет, Мінская губерня (цяпер г. п. Рудзенск, Пухавіцкі раён, Мінская вобласць)

Дата смерти: 1997

Краткая справка: работнік сельскай гаспадаркі (палявод, жывёлавод), Герой Сацыялістычнай Працы (1951), узнагароджаная ордэнамі Леніна, Працоўнага Чырвонага Сцяга, медалямі

Имена на других языках: Буцевич Ванда Антоновна (русский);

Ванда Антонаўна Буцэвіч нарадзілася ў вёсцы Рудзенск Пухавіцкага раёна Мінскай вобласці ў шматдзетнай сялянскай сям’і. Дзіцём перажыла акупацыю вёскі войскамі кайзераўскай Германіі ў лютым – снежні 1918 г. і польскімі войскамі ў жніўні 1919 – ліпені 1920 г. З пачаткам калектывізацыі яна ўступіла ў мясцовы калгас і стала працаваць у паляводстве. У час Вялікай Айчыннай вайны яе муж прапаў без вестак, і Ванда Антонаўна адна выхоўвала дзяцей.

З лета 1944 г. пачала працаваць брыгадзірам калгаса “Маяк сацыялізму”. Яе брыгада першай разлічвалася з пастаўкамі хлеба дзяржаве, датэрмінова выконвала абавязацельствы па іншых відах паставак.

У пасляваенны час асноўнай спецыялізацыяй калгаса стала вырошчванне кок-сагызу, у млечным соку каранёў і падземных сцёблаў якой змяшчаецца каўчук. Для гэтай культуры калгасам былі адведзены асобныя участкі і створаны спецыялізаваныя звёны па яе вырошчванні. Адно з іх было даручана ўзначаліць В.А. Буцэвіч.

Добрасумленная і самаадданая праца каўчукаводаў дала свае вынікі ўжо у першы год іх працы: у 1949 г. Ванда Антонаўна з сяброўкамі сабралі па 62 цэнтнеры каранёў з кожнага гектара плантацый. Дбайная апрацоўка ўчасткаў і старанны догляд за пасевамі садзейнічалі хуткаму росту ўраджайнасці. У 1950 г. каўчукаводы на чале з В.А. Буцэвіч знялі па 83,7 цэнтнераў з кожнага гектара.

Указам Прэзідыума Вярхоўнага Савета СССР ад 18 мая 1951 г. за атрыманне ў 1950 г. высокіх ураджаяў каранёў кок-сагызу Вандзе Антонаўне Буцэвіч было прысвоена званне Героя Сацыялістычнай Працы з уручэннем ордэна Леніна і залатога медаля “Серп і Молат”.

У наступным годзе звяно Буцэвіч зноў атрымала добры ўраджай кок-сагызу. Па выніках працы В.А. Буцэвіч была ўзнагароджана ордэнам Працоўнага Чырвонага Сцяга.

У 1950-я гг. Ванда Антонаўна займалася вырошчваннем гародніны. У 1953 г. на 25 гектарах яе брыгада вырасціла багаты ўраджай – па 450 цэнтнераў сталовай морквы, 400 цэнтнераў бручкі, 200 цэнтнераў таматаў, 240 цэнтнераў ранняй і 350 цэнтнераў позняй капусты з кожнага гектара.

Пасля далучэння ў 1960 г. калгаса “Маяк сацыялізму” да саўгаса “Рудзенскі” Ванда Антонаўна працавала ў жывёлагадоўлі. У 1964 г. выйшла на заслужаны адпачынак. Прымала актыўны ўдзел у грамадскім жыцці. Выбіралася дэлегатам 1-й Усебеларускай канферэнцыі прыхільнікаў міру. Узнагароджана ордэнамі Леніна, Працоўнага Чырвонага Сцяга, медалямі.

Пераклад 2021 г. матэрыялаў інтэрнэт-праекта “Герои страны”.