Настасся Рудольфаўна Герман нарадзілася ў вёсцы Новыя Юрковічы Любанскага раёна Мінскай вобласці ў шматдзетнай сям’і. Атрымала няпоўную сярэднюю адукацыю ў мясцовай школе і з 15 гадоў працавала ў калгасе “Сталёвы конь” у вёсцы Новыя Юрковічы. У 1937 г. перайшла на свінагадоўчую ферму калгаса і неўзабаве стала адной з лепшых свінарак гаспадаркі. У 1941 г. атрымала права ўдзелу ў рабоце Усесаюзнай сельскагаспадарчай выставы ў Маскве.

З пачаткам Вялікай Айчыннай вайны засталася на акупіраванай тэрыторыі. Пасля вызвалення раёна Н.Р. Герман пайшла працаваць цялятніцай на жывёлагадоўчую ферму калгаса “Сталёвы конь”, які праз пяць гадоў увайшоў у склад узбуйненага калгаса імя Гарбачова.

Настасся Рудольфаўна шмат працавала над тым, каб вырасціць племянны статак калгаса. Заботліва і карпатліва даглядала за цялятамі, дабіваючыся каб выгадаваць кароў з вялікай удойнасцю. За дасягнутыя поспехі ў развіцці жывёлагадоўлі ў перыяд выканання заданняў сёмага пяцігадовага плана была ўзнагароджана ордэнам Працоўнага Чырвонага Сцяга. Настасся Герман нязменна паказвала ўзоры самаадданай працы, а ў перыяд выканання заданняў восьмай пяцігодкі зноў дамаглася найлепшых паказчыкаў сярод жывёлаводаў раёна.

Указам Прэзідыума Вярхоўнага Савета СССР ад 8 красавіка 1971 г. за выдатныя поспехі, дасягнутыя ў развіцці сельскагаспадарчай вытворчасці і выкананні пяцігадовага плана продажу дзяржаве прадуктаў земляробства і жывёлагадоўлі, Настассі Рудольфаўне Герман было прысвоена званне Героя Сацыялістычнай Працы з уручэннем ордэна Леніна і залатога медаля “Серп і Молат”.

Некалькі разоў Н.Р. Герман была ўдзельніцай Выставы дасягненняў народнай гаспадаркі СССР, узнагароджвалася дыпломамі і медалямі Галоўнага выставачнага камітэта. Пасля выхаду на заслужаны адпачынак у 1975 г. на грамадскіх пачатках загадвала калгасным Домам жывёлаводаў. Узнагароджана ордэнамі Леніна, Працоўнага Чырвонага Сцяга, медалямі. Імя Настассі Рудольфаўны Герман увекавечана на Алеі Герояў у Любані.

Пераклад 2021 г. матэрыялаў інтэрнэт-праекта “Герои страны”.