Марыя Васільеўна Анібраева нарадзілася ў Віцебску ў шматдзетнай сям’і рабочага. У перыяд акупацыі Віцебскай вобласці (1941–1944) разам з маці жыла ў сваякоў у Лёзненскім раёне. Летам 1944 г. вярнулася ў Віцебск.

У 1950 г. Марыя скончыла сем класаў сярэдняй школы і стала працаваць на швейнай фабрыцы “Сцяг індустрыялізацыі”. Пачынала вучаніцай: вучылася шыць верхняе адзенне для мужчын. Праз некаторы час старанная і кемлівая дзяўчына авалодала спецыяльнасцю швачкі-матарысткі і стала працаваць самастойна. З цягам часу М.В. Анібраева вывучыла ўсе тэхналагічныя працэсы і паспяхова асвоіла вытворчасць асартыменту прадукцыі свайго цэха. У перыяд восьмай пяцігодкі (1966–1970) яна з поспехам сумяшчала некалькі вытворчых аперацый і пры неабходнасці паспяхова замяняла членаў сваёй брыгады. Адной з першых у цэху М.В. Анібраевай было прысвоена ганаровае званне “Ударнік камуністычнай працы”, а яе працоўны подзвіг быў адзначаны ордэнам Працоўнага Чырвонага Сцяга.

У канцы пяцігодкі кіраўніцтва цэха даверыла М.В. Анібраевай весці запуск дэталяў крою ў канвеер, рэгуляваць вытворчы працэс і задаваць яму дакладны тэмп, сачыць за забяспечанасцю швачак неабходнымі матэрыяламі, ніткамі і фурнітурай. У гады дзявятай пяцігодкі (1971–1975) Марыя Анібраева з’яўлялася адным з ініцыятараў руху за высокую прадукцыйнасць працы і датэрміновае завяршэнне планавых заданняў. За поспехі ў выкананні і перавыкананні плана 1973 г. і прынятых сацыялістычных абавязацельстваў была ўзнагароджана ордэнам Леніна. У гады дзясятай (1976–1980) пяцігодкі Марыя Анібраева выканала дзесяць гадавых заданняў пры выдатнай якасці вырабаў.

Указам Прэзідыума Вярхоўнага Савета СССР ад 12 мая 1977 г. за выдатныя поспехі ў выкананні плана на 1976 г. прынятых сацыялістычных абавязацельстваў, дасягненні найвышэйшай у галіне прадукцыйнасці працы, асабісты ўклад у павелічэнне выпуску высакаякасных тавараў народнага спажывання, вялікую творчую працу па выхаванні і прафесійнай падрыхтоўцы маладых рабочых Марыі Васільеўне Анібраевай было прысвоена званне Героя Сацыялістычнай Працы з уручэннем ордэна Леніна і залатога медаля “Серп і Молат”.

За наватарства і вялікія поспехі ў працы, значны ўклад у развіццё вытворчасці тавараў народнага спажывання і актыўны ўдзел у грамадскім жыцці М.В. Анібраева была ўдастоена звання “Заслужаны работнік прамысловасці Беларускай ССР”, адзначана сярэбраным медалём ВДНГ.

Гэтак жа ўдарна М.В. Анібраева завяршыла адзінаццатую пяцігодку (1981–1985). За гады працы праз школу Анібраевай прайшло больш за сто работніц, многія з якіх самі сталі сапраўднымі майстрамі сваёй справы. У гады дванаццатай пяцігодкі (1986–1990) М.В. Анібраева была ўдастоена чарговага знака ўдарніка пяцігодкі. Абіралася дэпутатам і членам Прэзідыума Вярхоўнага Савета Беларускай ССР 10-га склікання (1980–1985), Віцебскага гарадскога і Кастрычніцкага раённага саветаў дэпутатаў працоўных, Беларускага рэспубліканскага камітэта прафсаюза работнікаў лёгкай прамысловасці. Марыя Анібраева ўзнагароджана двума ордэнамі Леніна (1974; 1977), ордэнам Працоўнага Чырвонага Сцяга (1971), медалямі, адзначана Ганаровай граматай Вярхоўнага Савета БССР (1978), нагрудным знакам “Выдатнік лёгкай прамысловасці”, уладальніца ганаровага звання “Заслужаны работнік прамысловасці Беларускай ССР” (1979).

Пераклад 2021 г. матэрыялаў інтэрнэт-праекта “Герои страны”.