Гісторыя прадпрыемства пачынаецца ў 1945 г. з заснавання Маладзечанскага гарадскога малочнага завода. У лютым 1997 г. завод быў ператвораны ў адкрытае акцыянернае таварыства. У сакавіку 2009 г. з’явілася ААТ «Маладзечанскі малочны камбінат», куды ўвайшлі «Маладзечанскі гармалзавод», «Валожынскі масласырзавод», «Вілейскі гармалзавод» і «Нарачанскі масласырзавод». З красавіка 2022 г. Маладзечанскі малочны камбінат з’яўляецца Маладзечанскім вытворчым участкам ААТ «Мінскі малочны завод №1».

Перш чым стаць сучасным высокатэхналагічным прадпрыемствам, Маладзечанскі гармалзавод прайшоў доўгі шлях. У 1971 г. вытворчаыя магутнасці завода дазвалялі перапрацоўваць толькі 60 тон малака за змену. Увесь час на прадпрыемстве вялася работа па тэхнічным пераўзбраенні вытворчасці, зніжэнні выдаткаў на перапрацоўку сыравіны, паляпшэнні якасці прадукцыі і павелічэнні яе асартыменту.

Асноўнай сыравінай для вытворчасці прадукцыі з’яўляецца цэльнае малако, якое закупляецца ў гаспадарках Маладзечанскага раёна. Уся прадукцыя вырабляецца толькі з высакаякаснай сыравіны без прымянення хімічных рэчываў і дабавак. Вядзецца строгі кантроль якасці як зыходнай сыравіны, так і гатовай прадукцыі на ўсіх этапах яе вытворчасці.

Сёння Маладзечанскі вытворчы ўчастак вырабляе шырокі асартымент цэльнамалочнай і кісламалочнай прадукцыі і звыш двух дзясяткаў найменняў цвёрдых і паўцвёрдых сыроў. Тэхналогія вытворчасці лепшых інавацыйных прадуктаў прадпрыемства – сыроў «Мацарэла» і «Ракфорці» – стваралася разам з супрацоўнікамі Інстытута мясамалочнай прамысловасці Навукова-практычнага цэнтра па харчаванні НАН Беларусі.

Прадукцыя прадпрыемства мае шэраг узнагарод, атрыманых на выставах і конкурсах «Прадукт года», «Лепшыя тавары Рэспублікі Беларусь», «Сырны фестываль», «Чэмпіён густу», «Прадэкспа», «Інтэрфуд» і інш. Малочныя прадукты з Маладзечна карыстаюцца папулярнасцю не толькі ў Беларусі, але і за мяжой.

Матэрыял падрыхтаваны ў 2023 г.