Гідралагічны заказнік рэспубліканскага значэння “Падвялікі Мох” быў створаны ў Ганцавіцкім раёне Брэсцкай вобласці ў 2005 г. Мэтай заснавання стала захаванне ў натуральным стане аднайменнага леса-балотнага комплексу – аднаго з самых буйных на тэрыторыі Палесся. У 2015 г. яго тэрыторыя атрымала міжнародны статус Рамсарскага ўгоддзя.

Асноўным відам ландшафтаў з’яўляюцца азёрна-балотныя нізіны. Балотамі занята 27%, ляснымі масівамі – каля 29% тэрыторыі. Флора налічвае 459 відаў сасудзістых раслін, з якіх у Чырвоную кнігу Рэспублікі Беларусь занесены вярба чарнічная і пуханос альпійскі. На тэрыторыі прыроднага комплексу зарэгістравана 185 відаў пазваночных жывёл. Адзначаецца вялікая колькасць паляўнічых відаў (дзік, воўк, лісіца, казуля, лось, глушэц, цецярук). Сярод рэдкіх – рысь, арэшнікавая соня, балотная чарапаха, чорны бусел, змеяед, шэры журавель, сокал-кабец і інш.

У заказніку ў вызначаныя тэрміны дазволена паляванне, збор ягад і грыбоў. Для турыстаў распрацаваны экалагічныя сцежкі, абсталяваны месцы для адпачынку.

Матэрыял падрыхтаваны ў 2023 г.