Завод масла і сухога абястлушчанага малака ў Лунінцы (Брэсцкая вобласць) быў прыняты ў эксплуатацыю 19 снежня 1969 г. У той час яго праектная магутнасць па перапрацоўцы складала 50 т малака за змену. У асартыменце – сухое абястлушчанае і пастэрызаванае малако, сметанковае масла, тварог, смятана, кефір, клінковы і дыетычны сыры. У 1990-я гг. прадпрыемства пачало развіваць фірменны гандаль і было рэарганізавана ў адкрытае акцыянернае таварыства “Лунінецкі малочны завод”.

У цяперашні час завод уваходзіць у склад холдынга “Канцэрн Брэстмясамалпрам”. На ім працуе больш за 300 чалавек. Асноўным відам дзейнасці як і раней з’яўляецца перапрацоўка малака (да 250 т за змену). У выніку мэтанакіраванай мадэрнізацыі вытворчасці палепшылася якасць і пашырыўся асартымент прадукцыі. Завод выпускае малако, тварог, масла, ёгурт, сухія малочныя прадукты пад гандлёвымі маркамі “Малочная кропелька”, “Асаблівае”, “Белая карова”, “Золата Палесся”. Акрэдытаваная лабараторыя прадпрыемства праводзіць фізіка-хімічныя, мікрабіялагічныя і радыялагічныя даследаванні, чым гарантуе выпуск экалагічна чыстай прадукцыі. Кампанія імкнецца пашыраць рынкі збыту, супрацоўнічае не толькі з краінамі СНД, але і з Японіяй, Кітаем, мусульманскімі краінамі. Высокая якасць вырабаў падцвярджаецца шматлікімі ганаровымі граматамі, дыпломамі, сертыфікатамі, атрыманымі на конкурсах “Лепшая прадукцыя года”, “Чэмпіён смаку” і інш. ААТ “Лунінецкі малочны завод” з’яўляецца таксама лаўрэатам Прэміі Урада Рэспублікі Беларусь за дасягненні ў галіне якасці (2016, 2019, 2022).

Матэрыял падрыхтаваны ў 2024 г.