Галакціён Самсонавіч Размадзе нарадзіўся ў Грузіі. У 1934 г. скончыў Кутаіскі сельскагаспадарчы тэхнікум, вярнуўся дадому і стаў працаваць аграномам.

У 1935 г. Г. Размадзе прызвалі ў Чырвоную армію. Служыць яму давялося ў Забайкаллі. У 1938 г. ён быў удзельнікаў баёў паміж савецкімі і японскімі войскамі ля возера Хасан. У тым жа годзе Г. Размадзе быў звольнены ў запас і вярнуўся ў Грузію. У 1940 г. скончыў школу НКУС, працаваў следчым.

У лютым 1942 г. Г. Размадзе зноў стаў салдатам. Пасля заканчэння ваенна-палітычных курсаў быў палітруком. Увосень 1943 г. прыняў камандаванне 5-й стралковай ротай 190-га стралковага палка 5-й стралковай дывізіі 63-й арміі Бранскага фронту.

Капітан Размадзе асабліва вызначыўся падчас Рагачоўска-Жлобінскай аперацыі. У лютым 1944 г. перад воінамі 3-й арміі Беларускага фронту стаяла задача: фарсіраваць Дняпро і наступаць на Бабруйск. Рота Г. Размадзе павінна была фарсіраваць раку і замацавацца на супрацьлеглым беразе. На досвітку 21 лютага 1944 г. байцы выйшлі на бераг Дняпра, першымі пераправіліся цераз раку і авалодалі варожай траншэяй. Разлік кулямёта, які перашкаджаў прасоўванню роты, знішчыў асабіста капітан Размадзе. Пры пашырэнні плацдарма рота Размадзе імкліва атакавала праціўніка, які замацаваўся на шашы Рагачоў-Магілёў, выбіла яго з траншэй і вызваліла вёску Тошчыца. Пры падтрымцы танкаў і бронецягніка праціўнік пяць разоў спрабаваў вярнуць населены пункт, аднак байцы пад камандаваннем Г. Размадзе адбілі ўсе контратакі. Галакціён Размадзе быў тройчы паранены, аднак не пакінуў поле бою.

За ўзорнае выкананне баявых заданняў камандавання і праяўленыя пры гэтым адвагу і геройства 23 ліпеня 1944 г. Галакціёну Самсонавічу Размадзе было прысвоена званне Героя Савецкага Саюза.

Галакціён Размадзе прайшоў усю вайну. У 1946 г. звольніўся ў запас у званні маёра і пасяліўся ў Маскве. У 1980-я гг. атрымаў званне палкоўніка запасу. Узнагароджаны ордэнамі Леніна, Чырвонай Зоркі, медалямі.

Імя Галакціёна Размадзе ўшанавана ў мемарыяле воінскай славы «Лудчыцкая вышыня» разам з імёнамі герояў-вызваліцеляў Быхаўскага раёна: Івана Барысевіча, Пятра Вінічэнкі, Сундуткалі Іскаліева, Уладзіміра Мартынава і Гуляма Якубава.

Матэрыял падрыхтаваны ў 2024 г.