З сям’і служачага.

У 1917–1921 працавала настаўніцай у навучальных установах г. Бабруйска, бібліятэкарам у Бабруйскай гарадской бібліятэцы імя А. С. Пушкіна, арганізавала аддзел краязнаўчай літаратуры. Скончыла этналінгвістычнае аддзяленне факультэта грамадскіх навук БДУ (1925). У 1922–1937 – загадчык беларускага аддзела Дзяржбібліятэкі БССР. Займалася фарміраваннем фонду беларускіх нацыянальных дакументаў, удзельнічала ў стварэнні краязнаўчай бібліяграфічнай картатэкі. Член Літаратурнай і Этнаграфічнай секцый, сакратар Бібліяграфічнай камісіі Інбелкульта ад пачатку яе заснавання (1920-я). Стаяла ля вытокаў бібліяграфічнай рэгістрацыі выдавецкай прадукцыі ў БССР, з 1924 г. арганізавала выданне “Летапісу беларускага друку”. Падрыхтавала некалькі рэтраспектыўных выпускаў “Летапісу”, якія адлюстроўваюць: паасобныя выданні на беларускай мове за 1835–1916; перыядычны друк на беларускай мове; выданні на беларускай мове за 1917–1924 гг. Арганізатар і рэдактар першых персанальных картатэк Я. Купалы, Я. Коласа, З. Бядулі і інш., картатэкі па гісторыі беларускага тэатра. Склала бібліяграфію твораў Цішкі Гартнага, надрукавала матэрыялы да біяграфіі Цёткі. У часопісе “Наш край” (“Савецкая краіна”) апублікавала бібліяграфічныя матэрыялы “Народны тэатр на Ігуменшчыне”, “Бібліяграфія Віцебшчыны”, “Краёвая бібліяграфія”, “Краязнаўчая бібліяграфія” і інш. Падрыхтавала сістэматычны паказальнік “Беларускі перыядычны друк, 1917–1927” (1929). Удзельнічала ў падрыхтоўцы некалькіх “Кнігаспісаў” Беларускага дзяржаўнага выдавецтва. Прымала ўдзел у складанні бібліяграфічнага выдання “Флора і расліннасць Беларусі” (у суаўтарстве, у друк не выйшла). Рыхтаваўся працяг выдання “Беларускі перыядычны друк” за 1928–1937 (праца не завершана). Восенью 1937 г. разам з маці выехала ў г. Саратаў. Працавала галоўным бібліёграфам даведачна-бібліяграфічнага аддзела Навуковай бібліятэкі Саратаўскага дзяржаўнага ўніверсітэта, прымала ўдзел у падрыхтоўцы шэрага грунтоўных бібліяграфічных выданняў. Рэпрэсіравана (1937). У 1959 г. вярнулася ў Мінск. Аказвала кансультацыйныя паслугі калегам і чытачам, удзельнічала ў падрыхтоўцы бібліяграфічных выданняў Дзяржбібліятэкі БССР.

Працы: “Русская дореволюционная книга о Белоруссии” (1802–1916, 1964), “Беларуская ССР у друку сацыялістычных краін, 1946–1965” (1966), “Бібліяграфія па гісторыі Беларусі: феадалізм і капіталізм” (1969), “Асвета ў Беларускай ССР за 50 гадоў Савецкай улады” (1973) і інш. Аўтар успамінаў.

Узнагароды: медалі “За доблесную працу ў Вялікай Айчыннай вайне 1941–1945 гг.” (1945); імя ўнесена ў “Кнігу Народнай Славы” Дзяржбібліятэкі БССР (08.08.1972).