Рувім Саламонавіч Рэйзін нарадзіўся ў г. Лондане. З беднай сям’і саматужнікаў.

Рана застаўся без бацькі. Выхоўваўся ў дзіцячым доме ў г. Слуцку, некалькі разоў уцякаў. Працоўны стаж з 1920 г. З 1929 г. жыў у г. Мінску, скончыў прафтэхшколу, працаваў мулярам на будоўлі. Друкаваўся з 1929 г. на ідыш у яўрэйскіх газетах “Юнгер арбетер” (Мінск), “Окцябэр” (Мінск), часопісе “Штэрн” (Мінск), зборніках, альманахах. Студэнт рабфака, скончыў літаратурны факультэт яўрэйскага аддзялення Мінскага дзяржаўнага педагагічнага інстытута імя А. М. Горкага (1937). Накіраваны на працу ў вёску. Служачы. Працаваў на заводзе “Ударнік”, г. Мінск (?–12.1938/02.1939). З 22.12.1938 г. часовы супрацоўнік, бібліятэкар V разрада яўрэйскага аддзела (17.02.–14.03.1939) Дзяржбібліятэкі БССР. У радах РСЧА з 1940 г. Камандзір узвода (на лета 1940). Удзельнік Вялікай Айчыннай вайны з 06.1941 г. Загінуў на фронце.

Мемарызацыя: прозвішча сярод інш. на дошцы памяці пісьменнікам, загінулым у Вялікую Айчынную вайну, Саюз пісьменнікаў Беларусі, г. Мінск.