Мікалай Кірылавіч Малюшыцкі нарадзіўся ў г.п. Бялынічы Магілёўскай губерні (цяпер Магілёўская вобласць) у шляхецкай сям’і. У 1900 г. скончыў Маскоўскі сельскагаспадарчы інстытут. У 1900–1912 гг. выкладаў на кафедры батанікі сельскагаспадарчага аддзялення Кіеўскага політэхнічнага інстытута (цяпер Нацыянальны аграрны ўніверсітэт). З 1912 г. быў навуковым супрацоўнікам Кіеўскай краявой сельскагаспадарчай доследнай станцыі. У 1920 г. атрымаў вучонае званне прафесара. З 1921 г. працаваў загадчыкам кафедры раслінаводства Кіеўскага сельскагаспадарчага інстытута (зараз Украінская сельскагаспадарчая акадэмія). За гады кіраўніцтва кафедрай вучоны выканаў шэраг даследаванняў, прысвечаных уплыву асматычнага ціску глебавага раствору на рост, развіццё і ўраджайнасць сельскагаспадарчых раслін, селекцыі бульбы. У 1928 г. быў выбраны акадэмікам Беларускай акадэміі навук (цяпер Нацыянальная акадэмія навук Беларусі).

Вучоны разам з прафесарам Г.І. Гарэцкім быў арганізатарам Цэнтральнай бульбаводчай доследнай станцыі Беларускага навукова-даследчага інстытута сельскай і лясной гаспадаркі (цяпер Навукова-практычны цэнтр Нацыянальнай акадэміі навук Беларусі па бульбаводстве і плодаагародніцтве), якая стала першай вузкаспецыялізаванай навуковай установай Беларусі па культуры бульбы. Яна была створана 2 студзеня 1928 г. на базе саўгаса «Вялікая Сляпянка» і за гады свайго існавання аказала значны ўплыў на развіццё шырокіх селекцыйна-генетычных скрыжаванняў у СССР, перш за ўсё з фітафтора- і марозаўстойлівымі відамі. Першым дырэктарам і навуковым кіраўніком станцыі быў прызначаны М.К. Малюшыцкі. Ён займаўся аграхіміяй, прыкладной батанікай, селекцыяй і агратэхнікай найважнейшых культурных раслін, пытаннямі глебавага харчавання раслін, мадэрнізацыяй мясцовых сартоў сельскагаспадарчых культур, даследаваннем іх анатамічнай будовы і інш. Вучоны з’яўляецца аўтарам больш за 20 навуковых прац, сярод якіх –«К вопросу о значении эвапорометрических показаний для запросов сельскохозяйственной практики» (1900), «По поводу двадцатипятилетия одного исторического опыта» (1912), «Аб рэальнасці ажыццяўлення ідэі развіцця цукрова-бурачных плантацый ва умовах Беларусі» (1930) і інш.

Матэрыял падрыхтаваны ў 2022 г.