Вядомы вучоны ў галіне жывёлагадоўлі Віталь Сцяпанавіч Антанюк нарадзіўся на Украіне (г. Крамянчуг). У 1962 г. скончыў Віцебскі ветэрынарны інстытут і год працаваў заатэхнікам у Алтайскім краі. З 1963 па 1966 г. займаў пасаду дырэктара жывёлагадоўчага комплексу ў Нясвіжы. Да 1969 г. В.С. Антанюк працаваў у Мінскім абласным упраўленні сельскай гаспадаркі, з 1969 па 1974 г. працаваў у апараце ЦК КПБ: быў інструктарам сельскагаспадарчага аддзела, узначальваў сектар навукова-даследчых і навучальных устаноў. З 1974 па 1987 г. кіраваў Беларускім навукова-даследчым інстытутам жывёлагадоўлі, адначасова з'яўляўся генеральным дырэктарам Асацыяцыі «Племэліта». З 1987 па 1991 г. загадваў кафедрай Беларускага аграрна-тэхнічнага ўніверсітэта. У 1991 г. В.С. Антанюк быў абраны членам-карэспандэнтам УАСГНІЛ, у 1992 г. стаў акадэмікам Акадэміі аграрных навук Беларусі і Украіны.

У 1985 г. В.С. Антанюк стаў доктарам біялагічных навук, у 1989 г. – прафесарам. Асноўныя навуковыя працы вучонага прысвечаны пытанням размнажэння, развядзення і біятэхналогіі сельскагаспадарчых жывёл, тэхналогіям вытворчасці прадукцыі жывёлагадоўлі. Вынікі даследаванняў В.С. Антанюка ляглі ў аснову апублікаваных ім 214 навуковых артыкулаў, 13 кніг, двух даведнікаў і інш. Вучоны стварыў новы самастойны кірунак даследаванняў у галіне біятэхналогіі размнажэння і штучнага развядзення жывёл, які базіруецца на вывучэнні ўзаемасувязі і выкарыстанні біяхімічных механізмаў жыццядзейнасці клетак з іх фізіялагічнымі ўласцівасцямі. Яму належаць такія навуковыя працы ў гэтым кірунку, як «Биология и техника искусственного размножения свиней» (1978), «Организация воспроизводства сельскохозяйственных животных» (у суаўтарстве, 1985), «Биотехнические способы повышения эффективности оплодотворения сельскохозяйственных животных» (1988), «Основы интенсивных технологий производства молока и мяса» (у суаўтарстве, 1990), «Скотоводство и технология производства молока и говядины» (у суаўтарстве, 1998) і інш. В.С. Антанюк аўтар дзевяці пасведчанняў на вынаходніцтвы.

З 1991 г. Віталь Сцяпанавіч Антанюк займаў пост намесніка Міністра сельскай гаспадаркі і харчавання БССР, у 1992–2002 гг. узначальваў Акадэмію аграрных навук Беларусі, з'яўляўся навуковым кіраўніком Дзяржаўнай навукова-тэхнічнай праграмы «Аграпрамкомплекс», кіраваў навукова-тэхнічным саветам па гэтай праграме, узначальваў секцыю «Сельскагаспадарчыя навукі» Савета па каардынацыі фундаментальных даследаванняў у краіне, быў членам савета па абароне дысертацый. Вучоны ўзнагароджаны ордэнам «Знак Пашаны» (1971), Ганаровай граматай Вярхоўнага Савета БССР (1986), дыпломам Вярхоўнага Савета Рэспублікі Беларусь (1996). У 1980 г. В.С. Антанюк стаў лаўрэатам прэміі Савета Міністраў СССР.

Матэрыял падрыхтаваны ў 2014 г.