Нарадзіўся Віктар Іванавіч Дарашкевіч у в. Цёмнае Балота (цяпер в. Сасновы Бор) Шчучынскага раёна Гродзенскай вобласці ў сялянскай сям’і. У 1971 г. скончыў філалагічны факультэт Беларускага дзяржаўнага ўніверсітэта імя У.І. Леніна. Пасля атрымання дыплома працаваў выкладчыкам беларускай і рускай мовы і літаратуры ў Праўдзінскай сярэдняй школе Мінскага раёна. У 1971‒1974 гг. вучыўся ў аспірантуры пры Інстытуце літаратуры АН БССР. Праходзіў стажыроўку на кафедры класічнай філалогіі Вільнюскага ўніверсітэта. У 1974‒1978 гг. быў малодшым навуковым супрацоўнікам Інстытута літаратуры АН БССР. У 1977 г. абараніў кандыдацкую дысертацыю на тэму «Новолатинская поэзия Белоруссии и Литвы (первая половина XVI в.)». У 1978‒1982 гг. займаў пасаду вучонага сакратара Савета па каардынацыі навуковай дзейнасці пры прэзідыуме АН БССР. У 1982‒1990 гг. працаваў старшым навуковым супрацоўнікам Інстытута літаратуры АН БССР.

Выступаў у друку В. І. Дарашкевіч з 1965 г., калі у Шчучынскай раённай газеце «Савецкая вёска» і часопісе «Бярозка» былі апублікаваны апавяданні «Зорка Венера» і «Пачатак сяброўства». Вучоны атрымаў вядомасць як даследчык гісторыі старажытнай беларускай літаратуры, літаратурна-філасофскіх плыняў Беларусі і Літвы XV‒XVIII ст. У 1975‒1985 гг. Віктар Іванавіч працаваў над вершаваным перакладам на беларускую мову паэмы М. Гусоўскага «Песня пра зубра», абгрунтаваў яе ідэйна-эстэтычнае падабенства з вядомымі беларускімі творамі XVI ст. У перакладзе ён шырока выкарыстоўваў беларускія эквіваленты да паэтычных вобразаў і сродкаў старажытнарускай мовы арыгінала. Пры ўдзеле вучонага была распрацавана праграма па святкаванні 500-годдзя з дня нараджэння Францыска Скарыны. Літаратуразнавец з’яўляецца ўкладальнікам зборніка дакументаў і матрыялаў «Францыск Скарына» (1988).

Матэрыял падрыхтаваны ў 2023 г.