Уладзімір Сцяпанавіч Пашчасцеў нарадзіўся ў Іжэўску (Удмурція). Дзяцінства прайшло ў Мінску. Займаўся ў Мінскім мастацкім вучылішчы (1957–1962). У 1967 г. скончыў Беларускі дзяржаўны тэатральна-мастацкі інстытут (цяпер Беларуская дзяржаўная акадэмія мастацтваў). Вучыўся ў А. Кашкурэвіча, А. Паслядовіч, П. Любамудрава. Удзельнічае ў мастацкіх выстаўках з 1967 г. У 1969 г. У. Пашчасцеў прыняты ў члены Беларускага саюза мастакоў.

Працуе ў розных тэхніках станковай і кніжнай графікі. Галоўная тэма яго творчасці – сучаснік і яго навакольны свет. Ён шмат падарожнічае па родным краі і замежжы.

Мастацтвазнаўцы ў творчасці У. Пашчасцева асабліва выдзяляюць выразнасць і лаканічнасць яго графічнай мовы. Ён аўтар серый “Мінск перадсвяточны” і “З жыцця адной часці” (1968), “Палеская нафта” (1970), “Днём і ноччу” і “Свята ў калгасе” (1972), “Аўтагонкі” (1975), “Палескі пейзаж” (1977), “Вучэнні “Бярэзіна” (1978), “Адноўленае Палессе” (1981) і інш.; лістоў “Салігорскі калійны” (1968), “Рэчыцкія шафёры” (1971), “Уборка бульбы” (1972), “Песня” (1979), “За Добрыцай-ракою” і “Лета ў вёсцы” (1984) і інш.

Мастак аформіў і стварыў ілюстрацыі да кніг “Пра смелага ваяку Мішку і яго слаўных таварышаў” М. Лынькова (1969), “Пучок жыгучкі” К. Крапівы (1973), “Дожджык на колах” У. Юрэвіча, “Три повести о Малыше и Карлсоне” А. Ліндгрэн (1980),” Мы учимся писать” М. Гурэвіч ((1983; дыплом Усесаюзнага конкурсу мастацтва кнігі, 1984), “Як Бог стварыў свет:пераказ біблейскіх гісторый” У. Ліпскага (1993), буквароў Н. Старажовай і Т. Шанько (1992, 9 перавыданняў), А. Клышкі (1999), аформіў серыю кніг У. Поснікава “Приключения Карандаша и Самоделкина” (1998). Уладзімір Пашчасцеў – аўтар ілюстрацый да паэмы-казкі М. Багдановіча “Мушка-зелянушка і камарык – насаты тварык”, змешчанай у часопісе “Вясёлка” (1981, № 12).

Творы мастака знаходзяцца ў Нацыянальным мастацкім музеі Рэспублікі Беларусь, фондах Беларускага саюза мастакоў і Міністэрства культуры Расіі, Музеі сучаснага выяўленчага мастацтва ў Мінску, выставачным аб’яднанні “Цэнтральны Дом мастака” ў Маскве.

Матэрыял падрыхтаваны ў 2014 г.