Вучоны ў галіне бульбаводства, доктар сельскагаспадарчых навук (1976), прафесар (1979), заслужаны дзеяч навукі Беларусі (1978) Зінаіда Аляксандраўна Дзмітрыева нарадзілася ў г. п. Стругі-Красныя Пскоўскай вобласці (Расія). У 1950 г. скончыла Ленінградскі сельскагаспадарчы інстытут. З 1957 г. працавала ў Беларускім навукова-даследчым інстытуце бульбаводства і плодаагародніцтва ( у 1964–1982 гг. была намеснікам дырэктара). Больш за 30 гадоў навуковай дзейнасці З. А. Дзмітрыева прысвяціла бульбаводству Беларусі. Галоўным напрамкам даследаванняў вучонага з'яўлялася ўдасканаленне спосабаў вырошчвання бульбы ва ўмовах механізаванай вытворчасці, што непасрэдна звязана з максімальным выкарыстаннем патэнцыяльнай прадукцыйнасці новых інтэнсіўных сартоў. Вынікі гэтых работ адбіліся на ўдакладненні тэхналагічных працэсаў – ад падрыхтоўкі пасадачнага матэрыялу да пасляўборачнай даапрацоўкі бульбы. Даследаванні З. А. Дзмітрыевай дазволілі навукова абгрунтаваць дыферэнцыраваныя тэрміны пасадкі бульбы як аптымальныя для розных зон Беларусі. Было праведзена глыбокае вывучэнне праблемы размяшчэння раслін на пасяўной плошчы і прапанаваны дыферэнцыраваныя нормы расходу пасадачных клубняў у залежнасці ад іх масы, зоны вырошчвання і сорту. У шэрагу работ вучоным абгрунтаваны шляхі павышэння эфектыўнасці ўгнаенняў за кошт удасканалення прыёмаў вырошчвання бульбы; вызначана ступень насычанасці севазваротаў харчовай бульбы да 22–33 % і мэтазгоднасць паўторнага размяшчэння яе на палях, на якіх таксама вырошчвалася бульба ў мінулым годзе. Распрацоўкі даводзіліся да вытворчасці ў выглядзе завершаных тэхналогій, зацверджаных Міністэрствам сельскай гаспадаркі Беларусі, рэкамендацый, метадычных указанняў, а таксама ў перыяд вучобы бульбаводаў.

Зінаідзе Аляксандраўне належыць больш за сто навуковых прац. Вядомыя такія яе кнігі, як «Прогрессивная технология возделывания картофеля» (1976, разам з М. А. Дарожкіным, В. В. Валуевым), «Как вырастить высококачественный столовый картофель» (1983), «Справочник картофелевода» (1989, 2-е выд., у суаўтарстве) і інш. Як аўтарытэтны спецыяліст удзельнічала ў рабоце секцыі «Бульбаводства» Усесаюзнай акадэміі сельскагаспадарчых навук, вучонага савета Міністэрства сельскай гаспадаркі Беларусі, вучоных саветаў па абароне доктарскіх дысертацый. З'яўлялася кансультантам па падрыхтоўцы энцыклапедыі «Прырода Беларусі», членам рэдкалегіі часопіса «Весці Акадэміі навук БССР. Серыя сельскагаспадарчых навук».

Дзейнасць З. А. Дзмітрыевай атрымала высокую ацэнку. Яна ўзнагароджана ордэнам Працоўнага Чырвонага Сцяга, медалямі. Даследаванні былі адзначаны медалямі і дыпломамі ВДНГ СССР, аўтарскімі пасведчаннямі.

Матэрыял падрыхтаваны ў 2016 г.