Амаль дваццаць гадоў сваёй творчай дзейнасці акцёр, заслужаны артыст Беларусі Барыс Васільевіч Уксусаў прысвяціў Брэсцкаму абласному драматычнаму тэатру.

Нарадзіўся ён 24 ліпеня 1922 г. у Варонежы (Расія) у сям'і служачага. У 1939 г. паступіў у Варонежскае тэатральнае вучылішча. Вучоба юнака была спынена Вялікай Айчыннай вайной. З 1941 па 1944 г. ваяваў на фронце. У 1944 г. яго запрасілі ў адзін з франтавых ансамбляў, дзе выступаў да канца вайны. Пасля дэмабілізацыі працаваў у адэскім тэатры Савецкай Арміі. Пазней – у драматычным тэатры Крывога Рога.

У пачатку 1950-х гг. апынуўся ў Беларусі. З 1951 г. Б. Уксусаў – у складзе трупы Брэсцкага абласнога драматычнага тэатра, дзе працаваў да 1970 г. Ён адразу выдзеліўся сваім тэмпераментам, пластычнасцю, розумам і працаздольнасцю. Акцёр добра адчуваў своеасаблівасці характараў сваіх герояў і ярка паказваў іх на сцэне. Найбольш яскрава ў гэтым сэнсе яго талент раскрыўся ў ролі Кукушкіна ў спектаклі “Брэсцкая крэпасць” паводле К. Губарэвіча. Усё, што ёсць у рускім чалавеку і салдаце, было закладзена ў гэты вобраз. Роля выканана Б. Уксусавым з мноствам адценняў і почыркам майстра. На працягу многіх гадоў гэты спектакль з'яўляўся візітнай карткай тэатра. Першыя поспехі не закружылі галаву маладому акцёру: пра яго загаварыла прэса, публіка палюбіла і ўзнесла да рангу куміра. У 1955 г. ён атрымаў званне заслужанага артыста Беларусі. Барыс Уксусаў працаваў з захапленнем і самааддачай. Яго здольнасці ў поўнай меры раскрыліся ў драматычных і характарных вобразах Рабініна (“Юнацтва бацькоў” Б. Гарбатава), Сяргея (“Іркуцкая гісторыя” А. Арбузава) і інш. З поспехам выступаў Б. Уксусаў і ў пастаноўках па творах рускіх і замежных аўтараў: Фігаро (“Вар'яцкі дзень, або Жаніцьба Фігаро” П. Бамаршэ), Гарадулін (“На ўсякага мудраца хапае прастаты” А. Астроўскага), Штапноў (“Сокалы і крумкачы” А. Сумбатава-Южына), Трэплеў (“Чайка” А. Чэхава), у якіх акцёр арганічна спалучаў задуму аўтара з пачуццём псіхалагічнай праўды, смела карыстаўся нязвыклымі галасавымі мадуляцыямі, рэзкай пластыкай, камедыйнымі і драматычнымі фарбамі. Героі Б. Уксусава – натуры арганічныя, эмацыянальныя, з адкрытымі характарамі і моцнымі пачуццямі.

Пошукі драматычнага ў чалавечым характары вызначальныя ў ролях Марэсьева (“Сапраўдны чалавек” паводле Б. Палявога), Касагорава (“Уцёкі з ночы” братоў Тур), Алекі Дундзіча (аднайменная п'еса М. Каца і А. Ржашэўскага) і інш. Ролі Аляксея (“У добры час!” В. Розава), Троцкага (“Брэсцкі мір” К. Губарэвіча) і іншыя адметныя яркасцю знешняга і дакладнасцю ўнутранага малюнка. Творчая дзейнасць Б. В. Уксусава пакінула адметны след у развіцці нацыянальнага мастацтва Беларусі. З 1976 г. акцёр працаваў у Пензенскім абласным драматычным тэатры.

Матэрыял падрыхтаваны ў 2012 г.