Трухан Мікола (Мікалай Мікалаевіч)

Дата нараджэння: 18.08.1947 Плешчаніцы, г. п., Лагойскі раён, Мінская вобласць

Дата смерці: 20.03.1999

Кароткая даведка: дзеяч культуры, акцёр, рэжысёр, арганізатар і мастацкі кіраўнік тэатра "Дзе-Я?" (з 2004 г. – Новы драматычны тэатр)

Варыянты імя: Трухан Мікола

Імёны на іншых мовах: Трухан Николай Николаевич (руская);

Трухан Мікалай Мікалаевіч нарадзіўся ў гарадскім пасёлку Плешчаніцы Лагойскага раёна Мінскай вобласці. У 1969 г. скончыў Беларускі дзяржаўны тэатральна-мастацкі інстытут (курс Д. Арлова), у 1980 г. – Вышэйшыя рэжысёрскія курсы ў тэатры на Малой Броннай у Маскве (майстэрня А. Эфроса). З 1969 па 1971 г. працаваў у Беларускім тэатры імя Я. Коласа (цяпер Нацыянальны акадэмічны драматычны тэатр імя Я. Коласа). Быў акцёрам у Дзяржаўным рускім драматычным тэатры Беларусі (1972–1973), Краснаярскім тэатры юнага гледача (1973–1974), Беларускім рэспубліканскім тэатры юнага гледача (1975–1978). Сярод роляў М.М. Трухана асабліва вылучаюцца Пётр Бардзін («Салаўіная ноч» В. Яжова, 1971) і Трыгорын («Чайка» А. Чэхава, 1977). Працаваў рэжысёрам-пастаноўшчыкам у Гомельскім абласным тэатры (1980–1984), Магілёўскім абласным і Рэспубліканскім маладзёжным тэатрах (1985), Брэсцкім абласным тэатры (1986–1987). У гэты перыяд ён паставіў спектаклі «Ладдзя Роспачы» паводле У. Караткевіча (1982), «Прымакі» Я. Купалы (1983), «Узлёт» (1984) і «Вечар» А. Дударава (1987), «Патоп» («Дыхайце эканомна!..») А. Макаёнка (1987).

Мікалай Трухан з’яўляецца адным са стваральнікаў у 1987 г. Мінскага драматычнага тэатра «Дзе-Я?» (зараз Новы драматычны тэатр), у 1992–1999 гг. быў яго мастацкім кіраўніком. Рэпертуар складаўся з твораў беларускай і сусветнай мастацкай літаратуры, арыгінальных п’ес. Рэжысуры тэатра ўласцівы смеласць, неардынарнасць, арыгінальнасць мастацкай думкі, філасофскае асэнсаванне таямніцы чалавечага быцця ў спалучэнні з мяккім лірызмам. Лепшымі спектаклямі сталі «Роспач» паводле У. Караткевіча (1989), «Рагнеда» Н. Рапа (1990), «Чорт і Баба» Ф. Аляхновіча (1992), «Імжа» I. Кофты (1993), «Здань» паводле Ф. Аляхновіча (1995), «Круці…» паводле Ф. Аляхновіча (1996), «Распад» паводле розных п’ес У. Шэкспіра (1997), «Барановы кароль» М. Трухана і «Мёртвыя душы» паводле М. Гогаля (абодва 1998). Найбольш значнымі ролямі М. Трухана сталі Качкароў («Жаніцьба» Гогаля) і Фальстаф («Распад» паводле У. Шэкспіра). У 1995 г. філасофская «Здань» у рэжысуры М. Трухана была высока ацэнена на міжнародным фестывалі ў Эдынбургу (Шатландыя).

Матэрыял падрыхтаваны ў 2021 г.